टिचिङको फार्मेसीमा बच्चालाई पाइएन सिटामोल, कान्तिमा थर्मामीटर

देशकै ठूलो शिक्षण अस्पताल महाराजगञ्जको फार्मेसीमा बालबालिकाका लागि अत्यावश्यक सिटामोल नपाइने अवस्था रहेको छ । त्यस्तै, बालबालिकाको उपचारका लागि एकमात्र सरकारी अस्पताल कान्ति बाल अस्पतालको फार्मेसीमा सामान्य ज्वरो नाप्ने थर्मामीटर समेत उपलब्ध छैन ।

कान्ति बाल अस्पतालमा,सामान्य फार्मेसीमा पाइने माइक्रो लाइफको थर्मामीटर खोज्दा पाइएन । 

यी दुई ठुला अस्पतालमा बालबालिकाका लागि सिटामोल जस्तो साधारण औषधि र उपचार प्रक्रियाका लागि आवश्यक थर्मामीटरसमेत नहुनु गम्भीर विषय रहेको छ । अभिभावकहरू औषधि नपाउँदा चिन्तित छन् भने, सर्वसाधारणले सरकारी स्वास्थ्य संस्थाहरूको व्यवस्थापनप्रति प्रश्न उठाइरहेका छन्।

हेल्थपाटीको टिम २०८१ फागुन ५ गते सोमबार बिहान करिब ४ बजे शिक्षण अस्पतालको फार्मेसीमा बालबालिकाका लागि सिटामोल खरिद गर्न पुगेको थियो । तर, त्यहाँ सिटामोल उपलब्ध नभएको पाइयो । जब फार्मेसीमा सिटामोल खोजियो, त्यहाँका फार्मेसिस्टले कान्ति बाल अस्पताल जान सल्लाह दिनुभयो ।

त्यसपछि हेल्थपाटीको टिम कान्ति बाल अस्पतालको फार्मेसीमा पुग्यो । त्यहाँ सिटामोल त उपलब्ध थियो, तर थर्मामीटर भने भेटिएन । तर, अस्पताल परिसरबाहिरका निजी फार्मेसीहरूमा भने सिटामोल मात्र होइन, खोजेजस्तो थर्मामीटरसमेत सहजै पाइन्छ । यसले सरकारी अस्पतालका फार्मेसीहरूको व्यवस्थापनप्रति थप प्रश्न खडा गरेको छ । साथै आम नागरिकका लागि चिन्ताको विषय बनेको छ ।

अस्पताल परिसरबाहिरका फार्मेसीहरूमा सहजै पाइने औषधि र उपचारमा प्रयोग हुने सामग्री नै अस्पतालको आफ्नै फार्मेसीमा नपाउनु गम्भीर र संवेदनशील विषय हो । विशेष गरी आकस्मिक उपचार आवश्यक पर्ने बिरामीहरूलाई ठूलो असहजता भइरहेको देखिन्छ, जसले स्वास्थ्य सेवाको सहज पहुँचप्रति पनि गम्भीर प्रश्न उठाएको छ ।

हेल्थपाटीको टिम सिटामोल र थर्मामीटर किन्न जाँदा शिक्षण अस्पताल र कान्ति बाल अस्पताल परिसरबाहिरका सबै फार्मेसीहरू बन्द थिए ।देशकै ठूला र प्रमुख अस्पतालहरूको फार्मेसीमा बालबालिकाका लागि ज्वरो नाप्ने थर्मामीटर र ज्वरो कम गर्ने सिटामोल नपाइनु दुर्भाग्यपूर्ण र चिन्ताजनक विषय हो ।

बालबालिकालाई आकस्मिक रूपमा अस्पताल लैजाँदा शिक्षण अस्पतालमा सिटामोल नपाइनु र कान्ति बाल अस्पतालमा आवश्यक थर्मामीटर नपाउनुुमा औषधि सामग्री खरिदमा कमिसनको खेल होकी भन्ने शंका उब्जिएको छ । यसले स्वास्थ्य सेवा व्यवस्थापनप्रति गम्भीर प्रश्न उठाएको छ ।

साथै अभिभावकहरूलाई तनाव मात्र होइन, बाल स्वास्थ्य सुरक्षामा राज्यको ध्यान नपुगेको प्रष्टै उजागर गरेको छ । स्वास्थ्य तथा जनसंख्या मन्त्री प्रदीप पौडेल बेलाबखत विभिन्न अस्पतालहरूको निरीक्षणमा निस्कनुहुन्छ । तर, अस्पतालका फार्मेसीहरूमा के–कस्ता औषधि उपलब्ध छन् भन्ने विषयमा उहाँको ध्यान पुगेको जस्तो देखिएन ।

बालबालिकालाई आकस्मिक रूपमा अस्पताल भर्ना गराउँदा सिटामोल र थर्मामीटर नपाउँदा अभिभावकहरू अन्यत्र खोज्न बाध्य हुनु दुर्भाग्यपूर्ण अवस्था हो । यस विषयमा सम्बन्धित अस्पताल र स्वास्थ्य तथा जनसंख्या मन्त्रालयको तुरुन्त ध्यान जान जरुरी छ ।