ओमीक्रोनले मानिसलाई मार्दैछ, यसलाई सामान्य नठानौ : डब्ल्यूएचओ

विश्व स्वास्थ्य संगठन (डब्ल्यूएचओ) ले ओमीक्रोन भेरियन्टलाई सामान्य रुपमा नलिन आग्रह गरेको छ । 

डब्ल्यूएचओ प्रमुख डा.टेड्रोस अधानोमले मिडिया ब्रिफिङका क्रममा डेल्टाको तुलनामा ओमिक्रोनले खोप लगाएका मानिसलाई कम बिरामी बनाएपनि यो भेरियन्टलाई सामान्यमा वर्गिकरण गर्न नमिल्ने बताउनुभयो । 

अन्य भेरियन्टले जस्तै ओमिक्रोनले मानिसलाई अस्पताल भर्ना हुने अवस्था बढाएको र मानिसलाई मारिरहेको उहाँको भनाइ छ । 
'वास्तवमा ओमिक्रोनको केस यति धेरै बढिरहेको छ कि यसले समग्र स्वास्थ्य प्रणालीलाई नै चकित पारिरहेको छ, ’ उहाँले चिन्ता व्यक्त गर्नुभयो । 
अस्पतालरुमा अन्य बिरामीहरुको भीड बढिरहेको अवस्थामा कोरोना संक्रमण बढ्दा अन्य स्वास्थ्य समस्या भएकाहरुको उपचारमा वेवास्ता हुनेतर्फ उहाँले सचेत गराउनु भयो । 

सुरुमा कोरोना विरुद्धको खोप लगाइसकेका व्यक्तिहरुबाट संक्रमण नियन्त्रण हुने अवस्था नरहेको तर उनीहरु संक्रमणका कारण अस्पताल भर्ना र मृत्यु हुने जोखिम भने कम रहेको टेड्रोसले बताउनुभयो । 

खोपमा भएको असमनाताका कारण कोरोना भाइरस संक्रमणका कारण मानिसहरु मरिरहेको र उनीहरुको जागिर गुमिरहेको उहाँको तर्क छ । अल्फा, बेटा, डेल्टा, गामा र ओमिक्रोन भेरियन्ट देखा पर्नु पनि असमान खोप विरतणको परिणाम रहेकाे उहाँकाे निष्कर्ष छ ।

विश्वका १०९ देशले ७० प्रतिशत जनसंख्यालाई पूर्ण खोप लगाउन असमर्थ हुने देखिएको उहाँको अनुमान छ ।