कोरोना परीक्षण शुल्क २ हजार भन्दा बढी लिए प्रयोगशाला अनुमति खारेज 

काठमाडौं । निजी प्रयोगशालाहरुले तोकेको शुल्कभन्दा बढी पीसीआर शुल्क लिए अनुमति खारेज गर्ने चेतावनी स्वास्थ्य तथा जनसंख्या मन्त्रालयले दिएको छ ।

स्वास्थ्य तथा जनसंख्या मन्त्रालयको नियमित प्रेस ब्रिफिङमा प्रा.डा.प्रवक्ता जागेश्वर गौतमले इन्सिडेन्ट कमाण्ड सिस्टमको निर्णय सुनाउँदै २४ घण्टाभित्र पीसीआर शुल्क समायोजन नगरे परीक्षणको अनुमति खारेज गरिने जानकारी दिनुभएको हो । 

स्वास्थ्य मन्त्रालयले २४ घण्टे अल्टिमेटम  दिइएका प्रयोगशालाहरुमा ह्याम्स अस्पताल प्रयोगशाला, स्टार अस्पताल प्रयोगशाला, बि एन्ड बी अस्पताल प्रयोगशाला, नेपाल मेडिसिटी अस्पताल प्रयोगशाला रहेका छन् । यस्तै डिकोड जिनोमिक्स एन्ड रिसर्च सेन्टर, सौर्य हेल्थ केयर, सेन्ट्रल डाइग्नोस्टिक ल्याबरोटर एन्ड रिसर्च सेन्टर र इन्ट्रापिड डायग्नोस्नोस्टिक सेन्टर रहेका छन् ।

यी प्रयोगशालाहरुले गत सोमबार विज्ञप्ति जारी गर्दै आफूहरुले पीसीआर परीक्षण ३ हजार ८९९ भन्दा कममा गर्न नसक्ने बताएका थिए । 
साथै उनीहरूले सरकारको निर्णय नमानी बढी शुल्क लिए कालाबजारी गरेको कसुरमा कारबाही गर्न गृह मन्त्रालय र वाणिज्य विभागलाई पत्राचार गर्ने निर्णय भएको पनि बताउनुभयो ।  भदौ २८ गते स्वास्थ्य मन्त्रालयले देशभरका सबै प्रयोगशालाहरुले पीसीआर शुल्क २ हजार भन्दा बढी लिन नपाउने निर्णय गरेको थियो ।