सरकार स्वास्थ्य अन्तर्गतको शैक्षिक क्षेत्रमा थप लगानी गर्ने अवस्थामा छैन : मन्त्री पौडेल

स्वास्थ्य तथा जनसंख्या मन्त्री प्रदीप पौडेलले सरकारले शैक्षिक क्षेत्रमा थप लगानी गर्ने अवस्थामा नरहेको बताउनुभएको छ । शनिबार निजी अस्पतालहरूको छाता संगठन एसोसिएसन अफ प्राइभेट हेल्थ इन्स्टिच्यूसन अफ नेपालको २७औँ वार्षिकोत्सवका आवसरमा आयोजित शुभकामना आदान प्रदान कार्यक्रममा बोल्नुहुँदै यस्तो बताउनुभएको हो ।

उहाँका अनुसार स्वास्थ्य शिक्षा सम्बन्धी शैक्षिक पक्ष शिक्षा मन्त्रालयको कार्यक्षेत्रमा पर्ने भएकाले स्वास्थ्य मन्त्रालयबाट सीधा लगानी सम्भव छैन । यद्यपि उहाँले निजी स्वास्थ्य क्षेत्रको योगदान अपरिहार्य भएको भन्दै यसले स्वास्थ्य सेवा स्तर कायम राख्न, नेपालीलाई उपचारका लागि विदेश जानबाट रोक्न र मेडिकल पर्यटनको विकासमा महत्वपूर्ण भूमिका खेलेको बताउनुभयो ।

मन्त्री पौडेलले स्वास्थ्य क्षेत्रलाई सामान्य व्यवसाय नभई “सेवा उन्मुख व्यवसाय” का रूपमा बुझिनुपर्ने धारणा राख्नुभयो । उहाँका अनुसार सरकारी स्वास्थ्य संस्थाहरूले पूर्ण सरकारी बजेट पाउने भए पनि निजी संस्थाहरू आफ्नै लगानीमा जग्गा खरिददेखि पूर्वाधार निर्माण र खर्च व्यहोर्ने भएकाले सरकार अनुदानभन्दा नीतिगत सहजीकरणमार्फत सहयोग गर्न तयार छ ।

नीतिगत अस्पष्टता हटाउन, गुणस्तरीय जनशक्ति उत्पादनमा जोड दिन र प्रचलित कानुनलाई पूर्ण कार्यान्वयन गर्नुपर्नेमा जोड दिनुभयो । साथै, विदेशी नागरिकसँग सम्बन्धित स्वास्थ्य सेवामा देखिएका कानुनी जटिलता—विशेष गरी अंग प्रत्यारोपणमा नातेदारी प्रमाणित गर्ने प्रक्रियालाई सरल बनाउन सके नेपाललाई उन्नत स्वास्थ्य सेवाको गन्तव्य बनाउन सकिने उहाँको भनाइ थियो ।

मन्त्री पौडेलले निजी स्वास्थ्य संस्थाहरूलाई आफ्ना समस्या बुँदागत रूपमा मन्त्रालयमा पेस गर्न आग्रह गर्दै व्यावहारिक छलफल र सुधारको ढोका खुला रहेको बताउनुभयो । उहाँले निजी क्षेत्रसँग सहकार्य गरेर मात्र उद्देश्य प्राप्त गर्न सकिने उल्लेख गर्नुभयो ।