निजी सवारीमा जोर बिजोर, बार अनुसार पसल खोल्ने निर्णय

काठमाडौं ।  काठमाडौं उपत्यकामा निषेधाज्ञाको समय ७ दिन थप गरिएको छ । उपत्यकाका ३ प्रमुख जिल्ला अधिकारीहरुको आज बसेको बैठकले जनजीवनमा केही सहज हुने गरि खुकुलो बनाउँदै निषेधाज्ञा थप्ने निर्णय गरेको हो । 

निर्णयअनुसार निजी सवारी साधन जोर–विजोर प्रणालीमा चलाउन पाइनेछ भने बार अनुसार पसल सञ्चालन गर्न पनि पाइनेछ ।निषेधाज्ञाको समयमा ट्याक्सी पनि जोर विजोर प्रणालीमा चल्नेछ ।  अन्य सार्वजनिक सवारीसाधन भने चलाउन पाइने छैन ।

सोमबार, बुधबार र शुक्रबार विहान ११ देखि ४ बजेसम्म  डिपार्टमेन्टल स्टोर(ग्रोसरीबाहेक), सपिङ मल र खेलकुद सामग्री पसल, कपडा, जुत्ता, फेन्सी, कस्मेटिक, साडी, गिफ्ट आइटम, टेलरिङ सञ्चालन गर्न पाइने भएको छ ।

साथै आइतबार, मंगलबार र बिहीबार बिहान ११ बजेदेखि दिउँसो ४ बजेसम्म सुन पसल, भाँडा, भान्साजन्य, विद्युतिय घरायसी सामग्री,अटोमाबाइल पार्टस पसल, इलेक्ट्रोनिक पसल(मोबाइल तथा कम्प्यूटर पसल) आइतबार, मंगलबार, बिहीबार विहान ११ बजेदेखि दिउँसो ४ बजेसम्म खोल्न सकिने छ । 

यसैगरी निर्माणजन्य सामग्रीको पसल हार्डवेयर पसल,स्यानिटरी पसल, टायल, मार्बल, फर्निचर दैनिक बिहान ११ बजेदेखि अपरान्ह ६ बजेसम्म सञ्चालन गर्न पाइने छ । 

साथै विकास निर्माण र सार्वजनिक सेवा प्रवाहसँग सम्बन्धित सबै सरकारी कार्यालयहरु सूचारु हुने भएको छ । स्वास्थ्यका मापदण्ड पालना गरि आलोपालो प्रणाली कायम गरी न्यूतम जनशक्तिमात्र प्रयोग गरि सेवा सूचारु गर्ने निर्णय गरेको हो । साथै बैठकले बैंक, वित्तिय संस्था, धितोपत्र, बीमा, रेमिट, सहकराी, गैर सरकारी संस्थाहरु पनि स्वास्थ्य मापदण्ड पालना गरि सञ्चालन गर्ने निर्णय पनि गरेको छ ।