आगामी मंसिर २८ र २९ गते चिकित्सक संघको चौथो राष्ट्रिय स्वास्थ्य सम्मेलन,७ वटा विषयमा छलफल हुने

आगामी मंसिर २८ र २९ गते हुन गइरहेको नेपाल चिकित्सक संघको चौथो राष्ट्रिय स्वास्थ्य सम्मेलनमा ७ वटा विषयमा छलफल हुने भएको छ । 
मुख्य थिम हेल्थ बियोन्ड हेल्थ रहेको सम्मेलनमा तेस्रो राष्ट्रिय स्वास्थ्य सम्मेलन घोषणापत्रका प्रगति, चुनौती र अनुभवहरू, परिवर्तनकारी स्वास्थ्य प्रणाली र युनिभर्सल हेल्थ कभरेज, अनुसन्धान, अध्ययन र सहकार्यको क्षमता निर्माण, स्वास्थ्य संकट र महामारीका लागि पूर्वतयारी,चिकित्सा शिक्षा सुधार र नवप्रवर्तन,  स्वास्थ्यमा सञ्चार माध्यम, जनचेतना र उत्तरदायी पत्रकारिता  र संक्रामक रोग, व्यावसायिक र वातावरणीय स्वास्थ्यमा पानी, सरसफाइ र पोषणको प्रभावका विषमा छलफल हुने संघले जानकारी दिएको छ । 

सम्मेलनले नेपालको स्वास्थ्य प्रणालीलाई समृद्ध र दिगो बनाउन नीतिगत सुझावहरू प्रस्तुत गर्न मुख्य भूमिका खेल्ने संघको दाबी रहेको छ। 

महासचिव डा.सञ्जिव तिवारीका अनुसार स्वास्थ्यमा समता, दिगोपन र सेवाग्राही केन्द्रित अभ्यासलाई समेटेर मात्र समावेशी समाज निर्माण गर्न सकिने उल्लेख गर्दै यस विषयमा बहस र समाधान खोज्न देश(विदेशका विज्ञ, नीति निर्माता, स्वास्थ्यकर्मी, उद्यमीहरूको उपस्थितिमा छलफल हुनेछ ।