आइओएमले परीक्षा शुल्क बढाएकोप्रति विद्यार्थी संगठनको आपत्ति, तत्काल फिर्ता लिन माग
चिकित्सा शास्त्र अध्ययन संस्थान (आइओएम)ले विभिन्न विधाका नियमित तथा पूरक परक्षिा शुल्क बढाउन मेडिकल कलेजहरुलाई पत्र काटेकोमा विद्यार्थी संगठनहरुले आफ्नो गम्भिर ध्यानाकर्षण भएको जनाएका छन् । अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) र नेशनल मेडिकल स्टुडेन्ट एसोसियसन (एनएमएसए) ले विज्ञप्ति निकालेर डिन कार्यालयले आफ्नो क्षेत्राधिकार बाहिर गई आफैं शुल्क वृद्धि गरी विद्यार्थीलाई दुख दिने काम गरेको भन्दै उक्त कार्यको निन्दा गरेका छन् ।
अनेरास्ववियु महाराजगञ्ज नर्सिङ क्याम्पसका अध्यक्ष ऋचा घिमिरे, अनेरास्ववियु महाराजगञ्ज चिकित्सा क्याम्पसका अध्यक्ष विनय पज्ञानी र एनएमएसएका अध्यक्ष डा.मिलन गैरेले विज्ञप्ति निकालेर डिन कार्यालयलाई उक्त निर्णय फिर्ता लिन आग्रह गर्नुभएको छ । यदि त्यसाे नभए चर्काे आन्दोलनमा उत्रने चेतावनी उहाँहरुले दिनुभएको छ ।
‘चिकित्सा शिक्षा ऐन को परीक्षा शुल्क सम्बन्धि परिच्छेद ७ को दफा २ अनुसार सार्वजनिक शिक्षण संस्था बाहेक अन्य शैक्षिक संस्थाको हकमा आयोगले सम्बन्धित विश्वविद्यँलय, प्रतिष्ठान तथा शिक्षण संस्थासँग परामर्श गरि शुल्क निधारण गर्ने व्यवस्था छ । जसअुनसार डिन कार्यालयले आयोगको अधिकार आफ्नै हातमा लिएर आफैं शुल्क वृद्धि गरि विद्यार्थीलाई दुख दिएको कुरा स्पष्ट छ ।’ विज्ञप्तिमा भनिएको छ ।
आइओएमले गत कार्तिक ७ गते आफु मातहतका १५ वटा मेडिकल कलेजलाई परीक्षा शुल्क निर्धारण गरि कार्यान्वयनका लागि पत्र काटेको थियो । स्नातक तहको परीक्षा शुल्क नियमित तर्फ २५ सयबाट ९ हजार, स्नातकोत्तर तर्फ चिकित्सा विज्ञानको १ लाखबाट डेढ लाख र नर्सिङ तथा पारामेडिक्सको १ लाख निर्धारण गरिएको छ ।
तपाईँको अभिमत