मिल्ने साथी वा नजिकका व्यक्तिबाटै किशोरीहरू असुरक्षित रहेको खतरनाक तथ्याङ्क सार्वजनिक

किशोरीहरू मिल्ने साथी वा आफ्नै पार्टनरबाट शारीरिक तथा यौनजन्य हिंसाको शिकार हुने गरेको तथ्याङ्क सार्वजनिक भएको छ । ल्यान्सेन्ट जर्नलमा प्रकाशित तथ्याङ्कलाई विश्व स्वास्थ्य संगठनले ‘खतराको घण्टी’का रूपमा व्याख्या गरेको छ ।

सार्वजनिक तथ्याङ्कअनुसार २० वर्ष पुग्न लागेका किशोरीहरू आफ्ना मिल्ने साथीबाट हिंसामा पर्ने गरेका हुन् । करिब २४ प्रतिशत किशोरी त्यस्तो हिंसामा पर्ने गरेको बताइएको छ ।

गत वर्ष मात्र ६ जना मध्ये १ जना किशोरीले यस्तो हिंसा भोग्नु परेको तथ्याङ्क रहेको थियो ।

१५ देखि १९ वर्षसम्मका किशोरीहरू आफ्ना हितैसी केटा साथीबाट यस्तो हिंसामा पर्ने गरेका हुन् । यसमा पनि अल्पविकसित वा गरिब मुलुकहरूमा यस्तो हिंसा बढी रहेको तथ्याङ्कले देखाएको छ । अफ्रिकी क्षेत्रमा ४०–४७ प्रतिशत किशोरी यस्तो हिंसामा पर्ने गरेका छन् । त्यस्तै युरोप क्षेत्रका १० प्रशित किशोरीहरूले यस्तो किसिमको हिंसा भोग्नु परेको छ भने एसियाका ११ प्रतिशत किशोरी नजिक सम्बन्ध रहेको साथीबाट शारीरिक तथा यौनजन्य हिंसा भोग्नुपरेको छ ।

कम विकसित मुलुकमा किशोरीमाथि हुने हिंसा बढी हुनुमा केटीहरू माध्यमिक तहसम्म कम पुग्ने, उनीहरूमा सम्पत्तिको कानूनी हिस्सा नरहनेलगायत कारण छन् । उनीहरूमा सम्पत्तिको अधिकार नहुँदा उनीहरू थप कमजोर हुने अध्ययनले बताएको छ । यस्तै बालविवाहलाई पनि हिंसाको कारण मानिएको छ । १८ वर्ष नपुग्दै हुने विवाहले गर्दा आफ्नो पार्टनरसँग उमेर तथा उनीसँग आर्थिक रूपमा भर पर्नुपर्दा पनि यस्तो हिंसा हुने गरेको अध्ययनले देखाएको छ ।

यस किसिमको हिंसाले महिलाको मानसिक तथा बौद्धिक विकासमा नकारात्मक असर पर्ने अध्ययनकर्ताहरूले बताएका छन् । यस्तो हिंसामा पर्ने व्यक्तिको मानसिक तथा भविष्यमा हुने सम्बन्धमा पनि खराब असर पार्ने हुन्छ । त्यस्ता महिलामा डिप्रेशन हुने, डर तथा भय हुने जस्ता मानसिक समस्या हुन सक्छन् ।

यसैगरी यौनजन्य रोगहरू सर्ने खतरा पनि हुनसक्छ । अनिच्छित गर्भ रहने, शारीरिक चोटपटक लाग्न सक्ने, लगायत विभिन्न समस्या हुनसक्ने बताइएको छ ।