लुजडाउन ७ दिन थपिने : फास्टफुड खुल्ने, सार्वजनिक यातायात नखुल्ने

काठमाडौं । काठमाडौं उपत्यकामा खुकुलो बनाइएको निषेधाज्ञा(लुजडाउन) फेरि ७ दिन थपिने तयारी गरिएको छ । लुजडाउन अवधि थप्नेबारे छलफल गर्न उपत्यकाका ३ प्रमुख जिल्ला अधिकारीहरुको बैठक आज बस्दैछ । 

संक्रमण नघटेकाले अझै एक हप्ता निषेधाज्ञा थप्ने तयारी भएको ललितपुरका प्रमुख जिल्ला अधिकारी ढुण्डीप्रसाद निरौलाले जानकारी दिनुभयो । उहाँका अनुसार फास्टफुड खोल्ने तयारी भएको छ तर होटल तथा रेस्टुरेन्टमा बसेर खान भने पाइने छैन । सार्वजनिक यातायात यो हप्ता खोल्ने तयारी भएको थियो संक्रमण नघटेकाले तत्काल खुलाउने अवस्था नरहेको उहाँको भनाइ छ । 

व्यवसायीहरुले स्वास्थ्यका मापदण्ड अपनाएर सार्वजनिक यातायात पनि खोल्न दिनपर्ने माग गरिरहेका छन् । यद्यपी थपिन लागेको निषेधाज्ञामा के खुल्ने के नखुल्ने भन्ने विषयमा बैठकबाटै निर्णय गरिने निरौलाले बताउनुभयो । थपिने निषेधाज्ञामा पुरानै प्रावधानहरु कायम रहने छन् ।

यसअघि थपिएको निषेधाज्ञा भोली सकिदैंछ ।  अहिले निजी सवारी साधन जोर विजोर प्रणालीअनुसार सञ्चालनमा आएको छ भने कपडा पसल, सपिङ मल, एलोक्ट्रानिक पसल लगायतका व्यवसाय बारअनुसार स्वास्थ्यको मापदण्ड अपनाइ खुला गरिएको छ ।