१ करोड ७० लाख बालबालिकाले कुनै पनि खोप पाएनन्, दादुरा, पोलियोको जोखिममा
कोरोना महामारीका कारण सन् २०२० मा १ करोड ७० लाख बालबालिकाले एउटा पनि नियमित खोप पाएनन् । यस्तै २ करोड ३० लाख बालबालिकाहरूले नियमित स्वास्थ्य सेवा अन्र्तगत पाउने आधारभूत खोपहरु लिनबाट बन्चित भए, यो संख्या सन् २०१९ को भन्दा ३७ लाख बढी हो ।
विश्व स्वास्थ्य संगठन (डब्ल्यूएचओ) र युनिसेफले सार्वजनिक गरेको तथ्यांक अनुसार कोभिड–१९ को कारणले धेरै देशहरूमा अघिल्लो वर्ष बाल्यावस्थाको खोप कभरेजदरमा कमी आएको छ । सन् २०१९ को तुलनामा ३५ लाखभन्दा बढी बालबालिकाले डि.पी.टी को पहिलो मात्रा र साथै ३० लाख भन्दा बढी बालबालिकाहरूले दादुरा विरुद्धको खोपको पहिलो मात्रा लिन छुटेका छन् ।
कतिपय देशहरूमा खोप दिने क्लिनिकहरू बन्द गरिएका छन् वा क्लिनिक सञ्चालन हुने समयावधी कम गरिएको छ भने कोभिड–१९ को सङ्क्रमण हुने डर, निषेधाज्ञा र यातायात बन्दका कारण मानिसहरू स्वास्थ्य सेवा लिन हिचकिचाएका कारण बालबालिकाहरु खोपबाट छुटेको डब्ल्यूएचओ र युनिसेफले जनाएका छन् ।
साथै विद्यालयहरू बन्द हुँदा बालिकाहरूलाई दिइने पाठेघरको क्यान्सरविरुद्धको ह्युमन पापिल्लोमा भाइरस (एचपीभी) विरुद्धको खोपको कभरेजमा पनि कमी आएको छ । परिणाम स्वरूप हालसम्म एचपीभी खोप सञ्चालन गरेका देशहरूमा करिब १६ लाख थप बालिकाहरुले सन् २०२० मा उक्त खोप नपाएको तथ्यांकले देखाएको छ ।
डब्ल्यूएचओका महानिर्देशक डा. टेड्रोस अद्हानोम घेब्रेयसले कोभिड–१९ विरुद्धको खोप प्राप्तिका लागि देशहरुले दृढरुपमा आवाज उठाईरहेको बेला अन्य खोपहरूमा भने पछाडी परिरहेको भन्दै चिन्ता व्यक्त गर्नुभयो ।
जसले गर्दा बालबालिकाहरू घातक तर खोपबाट बचाउन सकिने रोगहरू जस्तै दादुरा, पोलियो र मेनिन्जाइटिस जस्ता रोगहरूको जोखिममा परेको उहाँले बताउनुभयो । युनिसेफका कार्यकारी निर्देशक हेनरियट्टा फोर भन्नुहुन्छ ‘यो तथ्य हाम्रो लागी स्पष्ट चेतावनी हुनुपर्दछ – कोभिड–१९ को महामारी र सम्बन्धित अवरोधहरुले हामीले हासिल गरेका महत्वपूर्ण उपलब्धिहरु गुमाउने अवस्थामा पुर्याउन सक्छ र गुमायौं भने यसको मुल्य सबैभन्दा बढी जोखिममा रहेकाहरुले चुकाउनु पर्ने अवस्था हुन्छ ।’
यी ११ वटा देशमा ८२ प्रतिशत बालबालिकाले मात्र डी.पी.टी. खोपको पूरा मात्रा पाएका छन् । जुन सन् २०१६ मा ९१ प्रतिशत भन्दा तलको अवस्था हो । गाभी, द भ्याक्सिन अलायन्सका प्रमुख कार्यकारी अधिकृत डा. सेथ बर्क्ले वर्षौँ लगाएर प्राप्त भएको उपलब्धीलाई विश्वव्यापी महामारीले तहसनहस गरीरहेकोे र यसले लाखौँ बालबालिकाहरु प्राणघातक र रोकथाम गर्न सकिने रोगहरूको जोखिममा परेको उल्लेख गर्नुभयो ।
बालबालिकाहरु नियमित खोपबाट छुटेपछि डब्ल्यूएचओ र युनिसेफले नियमित खोप सेवालाई तत्काल सुधार र लगानी गर्न सबै राष्ट्रहरुलाई आव्हान गरेका छन् ।
तपाईँको अभिमत