संक्रमण बढेको स्थानमा स्मार्ट लकडाउनको तयारी, कहाँ - कहाँ हुनसक्ला ?

निषेधाज्ञा खुकुलो भएसँगै कोरोना भाइरस संक्रमण बढ्न थालेपछि सरकारले संक्रमित धेरै रहेका स्थानहरुमा लकडाउन गर्ने तयारी गरेको छ । प्रधानमन्त्री शेरबहादुर देउवाको अध्यक्षतामा शुक्रबार बसेको कोभिड–१९ संकट व्यवस्थापन केन्द्र (सीसीएमसी) को निर्देशक समिति बैठकमा स्मार्ट लकडाउनकाे प्रस्ताव गरिएको छ । 

सीसीएमसीका प्रवक्ता नुरहरि खतिवडाले बैठकमा जहाँ संक्रमण बढी छ, सम्बन्धित जिल्ला वा स्थानीय तहले नै लकडाउन गर्न सक्ने अवधारणाको प्रस्ताव गरिएको जानकारी दिनुभयो । वैज्ञानिक र व्यवहारिक हुने गरी लकडाउनको प्रस्ताव गरिएको उहाँले बताउनुभयो । 
अब हुने लकडाउनमा जिल्लाले स्वयं अवस्था हेरेर निर्णय लिने र  संक्रमण बढेका स्थानहरुमा लकडाउन गर्ने र घटेका स्थानहरुमा  खुला गर्दै लैजाने तयारी भएको उहाँको भनाइ छ ।

संक्रमणको चेन ब्रेक गर्न भन्दै गत वैशाख १६ गतेदेखि काठमाडौं उपत्यकासहित अधिकांश जिल्लाहरुमा निषेधाज्ञा लगाइएको थियो तर असार पहिलो सातादेखि निषेधाज्ञा खुकुलो बनाइएको छ । 

अहिले विद्यालय, सार्वजनिक स्थाल, पार्टी प्यालेस, सिनेमा हल लगायत मानिसको भीड हुने स्थानहरु बन्द रहेपनि जनस्वास्थ्यका मापदण्ड कडाइका साथ पालना नहुँदा खुला रहेका क्षेत्रहरुबाटै संक्रमण फैलिरहेको अवस्था छ । 

हाल काठमाडौं उपत्यका, चितवन, मकवानपुर, नवलपारासी पुर्व, कास्की, रुपन्देही, सुर्खेत, मोरङ, सुनसरी र झापामा ५०० भन्दा बढी संक्रमितहरु उपचारर्थ रहको अवस्था छ । यस्तै केहीदिन देखि उपत्यकाका अस्पतालहरुमा गम्भिर प्रकृतिका संक्रमितहरुको चाप बढ्न थालेको चिकित्सकहरुले बताइरहेका छन् । 

हाल ३१ हजार १४ जना संक्रमित घर र स्वास्थ्य संस्थाहरुमा उपचाररत छन् । जसमध्ये ६८६ जना आइसियु र १६१ जना भेन्टिलेटरमा छन् । नेपालमा महामारी सुरु भएयता हालसम्म ७ लाख ५३ हजार ६६३ जनामा  संक्रमण पुष्टि भएको छ जसमध्ये ९ हजार ८३४ जनाको मृत्यु संक्रमणका कारण भइसकेको छ । यस्तै ६ लाख ९३ हजार १०९ जना संक्रमणमुक्त भएका छन् ।