सावधान : दशैँमा घर जाँदा कोरोना कोशेली लगिएला !
काठमाडौं । स्वास्थ्य तथा जनसंख्या मन्त्रालयका प्रवक्ता प्रा.डा.जागेश्वर गौतमले संक्रमण बढिरहेकाले सावधानी अपनाउन सबैलाई अपिल गर्नुभएको छ । उहाँले काठमाडौंमा निषेधाज्ञा खुलेपछि संक्रमण तीब्र भएको भन्दै स्वास्थ्य सुरक्षाका मापदण्ड अपनाउन सबैलाई अनुरोध गर्नुभएको छ ।
५० प्रतिशत संक्रमित काठमाडौंमा रहेको उहाँले बताउनुभयो । दशै नजिकिँदै जाँदा मानिसहरु घर गाउँ जाने क्रम चलिरहँदा प्रवक्ता गौतमले सचेत गराउनुभएको छ ।
नियमित प्रेस ब्रिफ्रिङका क्रममा उहाँले गर्नुभएको अनुरोधका केही अंश :
दशैँ नजिकिँदै गर्दा शहर र धनाबस्तीबाट आफ्नो घरगाउँ जाने क्रम सुरु भइसकेको छ । दिनानुदिन संक्रमण बढ्दै गइरहेकाले आफ्नो घरमा रहेका वृद्ध–वृद्धा, दीर्घरोगीहरुलाई कोरोनाबाट जोगाउन हामीलाई चुनौती थपिएको छ ।
दशैमा आशिर्वाद लिन घर जाँदा कतै कोरोना कोशेली त लिएर जाँदै छैनौँ भन्ने सोच्ने बेला आएको छ । संक्रमण बढे पनि र दशैँ नजिकिँदै गरे पनि आर्थिक समस्याका कारण कामका लागि लर्काे लागेर भारत जाने क्रम अत्याधिक छ । भारतमा संक्रमण अति उच्च रहेकाले यहाँबाट जाने नेपालीहरु पनि संक्रमणको जोखिम त्यत्तिकै छ । दिनानुदिन लक्षण सहितका संक्रमित थपिदै जाँदा सिमित स्रोत र साधन भएको हाम्रो जस्तो देशलाई व्यवस्थापनमा कठिनाई हुन सक्छ । त्यसैले संक्रमित भएपछि पछताउनुभन्दा रोग नै लाग्न नदिन सावधानी अपनाउनुनै उत्तम हुनेछ ।
तपाईँको अभिमत