अंग प्रत्यारोपण क्षेत्रका दुई संस्थाबीच एकता, 'दी हिमालय' प्रत्यारोपण सम्मेलन हुँदै

नेपालमा अंग प्रत्यारोपण गर्ने सोसाइटीहरुको आयोजनामा प्रत्यारोपण सम्मेलन हुने भएको छ। 'द हिमालयन ट्रान्सप्लान्ट कन्फ्रेन्स' नाम दिइएको सम्मेलन यही मंसिर २९ र ३० गते काठमाडौंमा हुन लागेको हो। 

सम्मेलनको मुख्य नारा 'विकासोन्मुख राष्ट्रहरूमा अंगदानलाई प्रवद्धन गर्नु' भन्ने रहेको सम्मेलन आयोजक समितिको साइन्टिफिक कमिटीका अध्यक्षमा डा. ऋषि कुमार काफ्ले जानकारी दिनुभयो। 

सम्मेलनबारे जानकारी दिन आज आयोजित पत्रकार सम्मेलनमा बोल्दै डा.काफ्लेले अंग प्रत्यारोपण क्षेत्रका नयाँ खोज, प्रविधि र अभ्यासहरूको आदान-प्रदानका लागि विशेषज्ञहरूलाई एकै ठाउँमा ल्याउने उद्देश्य राखिएको बताउनुभयो।

'अंग प्रत्यारोपणका क्षेत्रमा आफूले गरिरहेको कुरा बताउने, अरुले गरेका कुरा सुन्ने र एकै ठाउँ बसेर कसरी नेपालमा अंग प्रत्यारोपण गर्ने भन्ने कुराको बहस यो सम्मेलनमा हुन्छ'डा.काफ्लेले भन्नुभयो।

सम्मेलनले नेपालको अंग प्रत्यारोपण क्षेत्रमा नयाँ आयाम थप्ने विश्वास रहेको पनि उहाँले बताउनुभयो।

सम्मेलन आयोजक कमिटीकी सचिव डा. कल्पना कुमारी श्रेष्ठका अनुसार विभिन्न देशका गरी १९ विदेशी विज्ञले सम्मेलनमा प्रस्तुती राख्ने छन्। २६ वटा पेपर प्रिजेन्टेसन हुनेछ। 

भारत, अमेरिका बेलायत, जापान, नेदरल्याण्ड लगायतका देशका प्रत्यारोपण विज्ञ सम्मेलनमा सहभागी हुने डा.श्रेष्ठले जानकारी दिनुभयो। 

यसका अलवा नेपाली चिकित्सक, प्राविधिक, पत्रकार र प्रत्यारोपण क्षेत्रमा सरोकार राख्ने गरी करिब ३०० जना सम्मेलनमा सहभागी हुने सम्मेलन आयोजक समितिका अध्यक्ष डा. पुकार चन्द्र श्रेष्ठले जानकारी दिनुभयो।

नेपालमा अंग प्रत्यारोपण गर्ने चिकित्सकहरुका दुई संस्था एकीकृत भएका छन्।  सोसाइटी अफ अर्गान ट्रान्सप्लान्टेशन ( एनइएसओटी) र नेपाल ट्रान्सप्लान्टेसन सोसाइटी (एनटीएस) बीच एकता भएको छ । 

अहिले दर्ता प्रक्रियामा रहेको एकीकृत संस्थाको नाम सोसाइटी अफ अर्गान ट्रान्सप्लान्ट अफ नेपाल रहेको एकीकृत संस्थाका वर्तमान अध्यक्ष डा.पुकारचन्द्र श्रेष्ठले जानकारी दिनुभयो।

एकीकृत संस्थाको आगामी ३ वर्षका लागि डा.पुकारचन्द्र श्रेष्ठलाई अध्यक्ष तोकिएको छ । त्यसपछि थप ३ वर्षका लागि प्रा.डा.दिव्या सिंह शाह अध्यक्षमा चुनिनुभएको छ । त्यसपछिको नेतृत्वका लागि भने निर्वाचन गर्ने गरी दुवै सोसाइटीले सहमति गरेका छन्।

दुवै सोसाइटी एक भएर गर्न लागेको पहिलो सम्मेलन भएकाले पनि यसको विशेष महत्व रहेको सम्मेलन आयोजक समितिको साइन्टिफिक कमिटीका अध्यक्ष डा. ऋषि कुमार काफ्ले बताउनुभयो।

२९ गते साँझ ५ बजे कार्यक्रमको औपचारकि उदघाटन हुनेछ भने दोस्रो दिन अतिथि वक्ताहरू तथा चिकित्सक र अनुसन्धानकर्ताहरूलाई आफ्नो कार्यपत्र प्रस्तुत गर्ने र सम्मेलनको समापन गर्ने कार्यक्रम रहेको छ।