जटिल प्रकृतिका रोग लागेका बिमितलाई थप एक लाख उपलब्ध गराइने

हेल्थपाटी
आषाढ ०९, २०८२ ११:३१ मा प्रकाशित

अ + अ -

स्वास्थ्य बीमा गरेका बिमितलाई जटिल प्रकृतिका रोग लागेमा थप एक लाख रुपैयाँसहित दुई लाख उपलब्ध गराउन स्वास्थ्य मन्त्रालयले स्वास्थ्य बीमा बोर्डलाई निर्देशन दिएको छ ।

स्वास्थ्य तथा जनसङ्ख्या मन्त्री प्रदीप पौडेलले मन्त्रीस्तरीय निर्णय गर्दै स्वास्थ्य बीमा नियमावलीमा भएको व्यवस्थाअनुसार जटिल प्रकृतिका रोग लागेका बिरामीलाई उपचार सहुलियत थप गर्न स्वास्थ्य बीमा बोर्डलाई निर्देशन दिनुभएको हो । स्वास्थ्य मन्त्रीको निर्देशनपछि बोर्डले आगामी बैठकमा यो विषय राख्ने र आवश्यक निर्णय गर्ने बताएको छ ।

अब क्यान्सर, मुटु रोग, मिर्गौला रोग, हेड इन्जुरी, स्पाईनल इन्जुरी, सिकलसेल एनिमिया, पार्किन्सोनिज्म र अल्जाइमरका बिरामीले थप एक लाख रुपैयाँ उपचार सुविधा प्राप्त गर्नेछन् ।

यस आधारमा मन्त्रालयले स्वास्थ्य बीमा बोर्डलाई ७० वर्ष नाघेका ज्येष्ठ नागरिकले मात्र उपभोग गर्ने गरी पाउने सुविधामा नदोहोरिने गरी सुविधा दिन पत्राचार गरेको छ ।