ट्रम्प नाटकिय रुपमा अस्पतालबाट ह्वाइट हाउस फिर्ता

काठमाडौं । कोरोना संक्रमण पुष्टि भई अस्पताल भर्ना हुनुभएका अमेरिकी राष्ट्रपति डोनाल्ड ट्रम्प एक्कासी ह्वाइट हाउस फिर्ता हुनुभएको  छ । कोरोना पुष्टि भएपछि ट्रम्प वाल्टर रिड शैन्य अस्पतालमा ३ दिनदेखि उपचारत हुनुहुन्थ्यो ।

उच्च ज्वरोका साथै रगतमा अक्सिजनको मात्रा कम भएपछि डेक्सामेथोसोन औषधिसमेत चढाउनु परेको ट्रम्प नाटकिय रुपमा ह्वाइट हाउस फिर्ता भएको भन्दै सबै अचम्ममा परेका छन् । उपचारमा संलग्न चिकित्सकहरुले ट्रम्पको स्वास्थ्यमा सुधार आएको भए पनि खतरा भने अझै टरिनसकेको बताएका छन् ।

ट्रम्पलाई ह्वाइट हाउसमै २४ घण्टा विश्व स्तरीय मेडिकल केयरसहित स्वास्थ्यकर्मीको निगरानीमा राखिने जनाइएको छ । ट्रम्पले नोभेम्वरमा हुन लागेको चुनाव प्रचारका लागि सहभागी हुन इच्छा देखाउनुभएको छ । चुनावी अभियानमा सहभागी हुनकै लागि ट्रम्प छिट्टै अस्पतालबाट निस्किएको चर्चा पनि भइरहेको छ । अस्पतालबाट निस्कनुअघि ट्रम्पले आफू छिट्टै चुनावी प्रचारमा सहभागी हुन्छु भन्दै ट्वीट गर्नुभएको थियो । 

ट्रम्पले ह्वाइट हाउसको बाल्कोनीमा पुगेपछि मास्कसमेत हटाउनुभएको थियो । 'ट्रम्पले मलाई अहिले धेरै राम्रो महसुस भइरहेको छ, कोरोनाबाट डराउनुपर्दैन । कोरोना भाइरसलाई आफ्नो जीवनमा हाबी हुन नदिनुहोस्' भन्दै  ट्वीट गर्नुभएको छ । अमेरिकामा ७४ लाख मानिसलाई कोरोना पुष्टि भइसकेको छ भने २ लाख १० हजार संक्रमितको मृत्यु भएको छ ।