नेशनल बाथरोग सेन्टर १३ वर्षमा प्रवेश, अब मोबाइल एपमार्फत् बिरामीलाई परामर्श दिने

नेशनल बाथरोग सेन्टरले १२औँ वार्षिकोत्सव मनाएको छ । यस अवसरमा सेन्टरले मोबाइल एपको सुरुवात गरेको छ । 

बिहीबार वार्षिकोत्सव समारोहमा एपको औषधि व्यवस्था विभागका महानिर्देशक नारायणप्रसाद ढकालले उद्घाटन गर्नुभयो । मोबाइल एपमार्फत् बिरामीलाई परामर्श दिने तथा बिरामीले चिकित्सकसँगको भेट गर्ने समय मिलाउन सकिने बताइएको छ ।

एपमार्फत् बिरामीलाई औषधि खाने समय तथा विविध कुराको समय सङ्केत दिइने जनाइएको छ ।  

समारोहमा बोल्नुहुँदै महानिर्देशक ढकालले सेन्टरले सेन्टरको बाथरोग उपचार तथा अध्ययन अनुसन्धानमा तुल्याएको योगदानको चर्चा गर्नुभयो । उहाँले बाथरोगको औषधि नेपालमा अभाव रहेको र त्यसको पूर्तिका लागि अनुमति लिन आए प्रक्रियागत रूपमा विभागले सहयोग गर्ने बताउनुभयो ।

‘तपाईंहरू अनुमतिका लागि प्रस्ताव लिएर आउनुहोस्’, उहाँले भन्नुभयो, ‘हामी औषधि अभावलाई पूर्ति गर्न सहयोगका लागि तयार छौँ ।’

उहाँले भिटामिन ‘डी’को कमी नेपालीहरूमा भइरहेको भन्ने सुनिएको भन्नुहुँदै त्यसको वैज्ञानिक तथा तथ्यगत खोज अनुसन्धान गर्नुपर्ने बताउनुभयो । त्यसको तथ्यहरूको अभाव रहेको उहाँको भनाइ थियो ।

सेन्तरका अध्यक्षसमेत रहनुभएका बाथरोग विशेषज्ञ डा. विनित वैद्यले बाथरोगको समयमा नै पत्ता लगाएर उपचार गर्नुपर्ने बताउनुभयो । शरीरको प्रतिरोधात्मक अवस्थाका कारण बाथरोग हुने र त्यसले शरीरका विभिन्न अङ्गमा असर तुल्याउने भन्नुहुँदै त्यसको समयमा नै निदान गरे असरलाई कम गर्ने सकिने बताउनुभयो ।

यसैगरी उहाँले पछिल्लो समय नेपालीहरूमा पनि भिटामिन ‘डी’को कमी देखिए पनि त्यसको असर भने नदेखिएकाले नयाँ ‘इभोल्युसन’ आएका हुन सक्ने दाबी गर्नुभयो । ‘भिटामिन डीको कमी चाहिँ देखिएको पक्कै हो । तर यसको कमीले हुने असर चाहिँ देखिएको छैन’, उहाँले भन्नुभयो, ‘अहिले हामीले जाँच गर्न पनि छाड्यौँ । यो नयाँ इभोल्युसन नै हुनसक्छ ।’

सेन्टरका प्रबन्ध निर्देशक रोशन कक्षपतिले बाथरोगका बिरामी आफै पनि सचेत हुनुपर्ने बताउनुभयो । आफूहरू नाफा मात्र कमाउन नभई सचेतना फैलाउन उद्देश्य राखेर उद्दत रहेको भन्नुहुँदै सचेत भएर औषधिको प्रयोग गर्नुपर्ने सुझाव दिनुभयो । 

‘बिरामीले चिकित्सकको सल्लाहअनुसार औषधि समय मिलाएर खानुपर्छ’, उहाँले भन्नुभयो, ‘चिकित्सकले भनेको भन्दा धेरै पनि खानु भएन थोरै पनि खानु भएन । बिरामी सचेत हुनुपर्छ । यसका लागि हामी सधैँ सचेतना अभियान गरिरहेका हुन्छौँ ।’

सेन्टर १२ वर्ष पूरा गरेसँगै आफ्ना सेवाहरू विस्तार तथा परिस्कृत गरेर लैजान तयार रहेको कक्षपतिले जानकारी दिनुभयो ।

सेन्टरले वार्षिकोत्सवका अवसरमा आफ्ना उत्कृष्ट कर्मचारीलाई पुरस्कृत गरेको थियो । त्यस्तै अन्तरराष्ट्रिय फेलोसिप कार्यक्रममा पोस्ट डक्टरेट फेलोसिप पाउने दुई जना चिकित्सकलाई सम्मान गरेको थियो । यस वर्ष डा. मनिषा भोछिभोया र डा. आदिप अरुण श्रेष्ठले फेलोसिप पाउनुभएको थियो ।

सेन्टरले हाल ८ वटा शाखाबाट बाथरोग सम्बन्धी सेवा दिँदै आइरहेको छ । त्यस्तै ११ जना विशेषज्ञ चिकित्सकसहित १०८ जना दक्ष जनशक्ति कार्यरत रहेको प्रबन्ध निर्देशक कक्षपतिले जानकारी दिनुभयो ।