पूर्ण क्षमतामा यात्रु बोक्न सार्वजनिक सवारीलाई अनुमति, कति बढ्ला काेराेना ?

काठमाडौं । कोरोना संक्रमणको जोखिमका कारण सार्वजनिक यातायातका साधनमा सीमित मात्रै यात्रु बोक्न दिइएकोमा अब यो नियम हटेको छ । 

अब सार्वजनिक सवारीले क्षमता अनुसार यात्रु बोक्न पाउने भएका छन् । भाडा पनि पुरानै दरमा लिनुपर्ने छ । यसअघि आधा मात्रै सिटमा यात्रु राख्न पाउने र भाडा ५० प्रतिशत लिन पाउने गरी सार्वजनिक यातायातका साधन सञ्चालन गर्न अनुमति दिएको थियो । 

सोमबार बसेको मन्त्रिपरिषद् बैठकले संक्रमणको जोखिम बढ्दै गएको बेला व्यवसायीको दबाबमा पूर्ण क्षमताअनुसार सिटमा यात्रु राख्न दिने निर्णय गरेको एक मन्त्रीले जानकारी दिनुभएको छ ।  

यसअघि सिट क्षमताको आधा मात्रै यात्रु राख्ने निर्णय भए पनि सार्वजनिक यातायतका साधनले उभ्याएरसम्म पनि यात्रु बोक्दै आएका थिए।

काठमाडौं उपत्यका लगायत शहरी क्षेत्रमा कोरोना संक्रमणको दर तीब्र गतिमा बढिरहेका बेला गरिएको यस्तो निर्णयले संक्रमणको जोखिम झन बढ्ने चिन्ता थपिएको स्वास्थ्य मन्त्रालयका एक अधिकारीले बताउनुभयो। 

‘पूर्ण क्षमतामा भनेपछि कोचाकोच गरेर यात्रु बोक्ने हुन्, यसरी त कसरी दूरी कायम हुन्छ, स्वास्थ्य मापदण्ड कसरी पालन हुन्छ ?’ ती अधिकारीले प्रश्न गर्नुभयो । देशभर एक जना मात्रै संक्रमित भेटिँदा सार्वजनिक सवारी बन्द गरेको सरकारले किन यस्तो निर्णय गरेको आफूले बुझ्न नसकेको उहाँको भनाइ छ ।