काेराेनाकाे अवस्था पत्ता लगाउन ‘सेरो प्रिभिलेन्स सर्वे’ ३१५० नमुना संकलन

काठमाडौं । नेपालमा कोरोना संक्रमणको अवस्था पत्ता लगाउन देशभर एन्टीबडी परीक्षण गरिएको छ । प्रत्येक प्रदेशमा ४५० जनाको दरले सातै प्रदेशमा गरि ३ हजार १५० जनाको नमुना(रगत) संकलन गरिएको ईपिडिमियोलोजी तथा रोग नियन्त्रण महाशाखा (ईडिसिडि) प्रमुख डा.बासुदेव पाण्डेले जानकारी दिनुभयो । 

उहाँका अनुसार ५ वर्षमाथिका उमेरसमुहका व्यक्ति र बाहिरबाट नेपाल आई ४ हप्ता बसेको व्यक्तिको नमुना लिइएको छ । समुदायमा गरिने परीक्षण ‘सेरो प्रिभिलेन्स सर्वे’ अध्ययन सकियो, २ हप्ता अगाडि नै नमुना लिने काम पनि सम्पन्न भइसकेको छ, नमुना परीक्षणका लागि गत शुक्रबार मात्रै रि–एजेन्ट ल्याइएको छ, पाण्डेले भन्नुभयो, 'राष्ट्रिय जनस्वास्थ्य प्रयोगशाला (एनपीएचएल)ले परीक्षणको प्रक्रिया अघि बढाइसकेको छ, अब हप्ता दिनमा नतिजा आउनेछ ।' 

सातै वटा प्रदेशमा प्रत्येक प्रदेशको ३० वटा वडाका १५ परिवारको नमुना लिइएको छ । प्रतिपरिवार १ जनाको नमुना संकलन गरियो, नमुना बैज्ञानिक आधारमा लिइएको पाण्डेले बताउनुभयो । उहाँले भन्नुभयो, 'हामीले उमेर अनुसार कम्युटरमा रेकर्ड राख्यौँ र किस्ट ग्रिटका आधारमा कम्युटरले नै नम्वर छानेपछि नम्वरका आधारमा व्यक्तिको नमुना लिइयो ।'  

एन्टीबडी परीक्षण किन ?
ईडिसिडिका अनुसार यो परीक्षण गरेपछि हालसम्म नेपालमा कति प्रतिशत व्यक्ति संक्रमित भए भन्ने पत्ता लाग्छ । विश्व स्वास्थ्य सगंठनले हाल नेपालको संक्रमणको समुहमा रहेको बताउँदै आएको छ, विज्ञहरुले समुदायमा फैलिसकेको बताइरहेका छन् तर यो सर्वेबाट संक्रमणको एकिन अवस्था पत्ता लाग्नेछ ।

एन्टीबडी परीक्षण कोरोना भाइरसको सक्रिय संक्रमण पत्ता लगाउनका लागि होइन । यो परीक्षणबाट शरीरमा कोरोना भाइरस संक्रमण भइसकेको भए त्यसविरुद्ध शरीरले उत्पादन गरेको भाइरस प्रतिरोधी प्रोटिन भए र नभएको  पनि पत्ता लाग्छ । 

ईडिसिडि प्रमुख पाण्डेका अनुसार, मानौ, सर्वेबाट संक्रमणदर ५० प्रतिशतभन्दा मुनि देखियो भने हामीले संक्रमण उच्च बिन्दुमा पुग्नै बाँकी छ भनेर बुझ्नुपर्छ र सोही अनुसार नियन्त्रणको तयारी गर्नुपर्नेछ भने ५० प्रतिशतभन्दा बढी देखिए महामारी उच्च बिन्दुमा गइसकेको छ, अब क्रमिक रुपमा घट्नेछ भनेर बुझ्नुपर्दछ ।

त्यसैले महामारीको अवस्था पत्ता लगाएर महामारी रोकथाम तथा नियन्त्रण गर्ने रणनीति बनाउन समुदायमा परीक्षण (सेरो प्रिभिलेन्स अध्ययन) महत्वपूर्ण छ । विश्व स्वास्थ्य संगठन(डब्ल्यूएचओ)को प्राविधिक सहयोगमा ईडिसिडि र एनपीएचएलको समन्वयमा काठमाडौं उपत्यका सहित देशभर एन्टीबडी परीक्षण गरिएको हो ।