आइओएमका विद्यार्थी र प्रहरीबीच झडप, १० विद्यार्थी प्रहरी नियन्त्रणमा

त्रिवि चिकित्सा शास्त्र अध्ययन संस्थान आईओएममा होस्टेल व्यवस्थित हुनपर्ने माग राख्दै आन्दोलन गरिरहेका विद्यार्थी र प्रहरीबीच झडप भएको छ ।
आज बिहान विद्यार्थीहरुले डीनको कार्यालयमा लगाएको ताला आइओएम प्रशासनले प्रहरी लगाएर फोडेपछि झडप भएको थियो । स्थिति नियन्त्रणमा लिन प्रहरीले सामान्य लाठी प्रहारसमेत गरेको थियो ।
प्रहरीविरुद्ध उत्रिएका विद्यार्थीमध्ये १० जनालाई प्रहरीले नियन्त्रण लिएको चिकित्सा शिक्षा संघर्ष अभियानका महासचिव सौगात पाण्डेले जानकारी दिनुभयो । उहाँका अनुसार आइओएममा होस्टेल व्यवस्थित गनुपर्ने माग राख्दै २९ दिनदेखि विद्यार्थीहरु आन्दोलित थिए र आज दबाब स्वरुप डीनको कार्यालयमा ताला लगाइएको थियो ।  यद्यपी आइओएमका विद्यार्थी समूहले चिकित्सा शिक्षा संघर्ष अभियान अन्तर्गत आइओएमको विकृति विरुद्ध आन्दोलन गर्दै आएका छन् ।

मेडिकल कलेज स्थापना गर्दा जम्मा विद्यार्थी संख्यामा कम्तिमा ७५ प्रतिशतलाई पुग्ने गरि होस्टेल हुनपर्ने व्यवस्था छ  । २०५० सालमा स्थापना भएको आइओएममा वर्र्षेनी विद्यार्थी संख्या बढ्दै जाँदा विद्यार्थीले होस्टेलको समस्या भोगिरहेका छन् । हाल करीब ५०० जना विद्यार्थी अध्ययनरत रहेको आइओएममा १०० जनालाई मात्रै पुग्ने होस्टेलको व्यवस्था रहेको पाण्डेको भनाइ छ।

यसरी आइओएममा होस्टेल अपूग रहँदा बाहिर मासिक १५ हजार तिरेर होस्टेल बस्नुपरिरहेको बाध्यता विद्यार्थीको रहेको उहाँले गुनासो सुनाउनुभयो ।  जबकी आइओएममा होस्टेल फि मासिक १ हजार रुपैया तिरे पुग्छ ।