जनशक्तिको अभावले भुक्तानीमा ढिलाई भएको बीमा बोर्डको भनाइ, सेवा नरोक्न अनुरोध
बीमा सेवा बापत्को रकम भुक्तानी नभएको भन्दै केही अस्पतालहरुले उक्त सेवा बन्द गर्ने बताएपछि बीमा बोर्डले यथासक्य भुक्तानी गर्ने बताएको छ ।
बोर्डका कार्यकारी निर्देशक डा. दामोदर बसौलाले विज्ञप्ति निकालेर परिक्षण भएका दाबीहरूको भुक्तानी यथाशिघ्र गर्ने र आगामी दिनमा कार्यतालिका तयार गरी नियमित भुक्तानी गरिने जानकारी दिनुभएको छ । उहाँले बीमितहरूलाई नियमित रूपमा स्वास्थ्य सेवा प्रवाह गर्न प्रदायक स्वास्थ्य संस्थालाई अनुरोध गर्नुभएको छ ।
‘केही सेवा प्रदायक स्वास्थ्य संस्थाहरूले आर्थिक वर्षको अन्तमा भुक्तानी नहुने हो कि भन्ने आशंकामा सेवा स्थगन गरिनेछ भन्ने सूचना प्रकाशित गरेको पाईएकाले छ तर स्वास्थ्य बीमा कोष व्यवस्थापन तथा संचालन कार्यविधि, २०७८ अनुसार स्वास्थ्य बीमा कोष स्थापना भई बोर्डमा प्राप्त सम्पूर्ण रकम उक्त कोषमा मौज्दात रहने व्यवस्था छ र परिक्षण भएका दाबीहरूको बाह्र महिना भुक्तानी गर्न सकिने व्यवस्था रहेको छ ,’ विज्ञप्तिमा भनिएको छ ।
बीमा बोर्डमा हाल दैनिक हुने दाबी बढ्दो क्रममा रहेको कारण दाबी प्रविष्ट हुने र दाबी परिक्षण गर्ने अनुपातमा तादम्यता मिलाउन जनशक्तिको अभावमा केही बिलम्ब हुन गएको विज्ञप्तिमा उल्लेख गरिएको छ ।
बीमा वापत्को रकम भुत्तमनी नभएपछि शिक्षण अस्पताल महाराजगञ्ज, पुर्वका बीएण्डसी अस्पताल र नोभेल मेडिकल कलेजले असार २० गतेबाट सेवा नदिने घोषणा गरिसकेका छन् भने अरु केही अस्पतालहरुले सेवा बन्द गर्ने तयारी गरेका छन् ।
सामाजिक स्वास्थ्य सुरक्षाको अवधारणामा संचालित स्वास्थ्य बीमा कार्यक्रम ७७ जिल्लाका ७४६ वटा स्थानीय तहमा लागू भएको छ । हालसम्म करिब ५६ लाख ३९ हजार नागरिक स्वास्थ्य बीमा कार्यक्रममा आवद्ध रहेको बोर्डले जानकारी दिएको छ ।
बोर्डका अनुसार हाल सेवा प्रदायक स्वास्थ्य संस्थाहरूबाट दैनिक २५ देखि २० हजार संख्यामा दाबी भइरहेको छ । देश भरका ४५० वटा सेवा प्रदायक स्वास्थ्य संस्थासँग बोर्डले सम्झौता गरी बीमा कार्यक्रम संचालन भईरहेको छ ।
बोर्डका अनुसार स्वास्थ्य सेवा प्रदायकले बीमितलाई सेवा प्रदान गरिसकेपछि सो वापतको भुक्तानीको लागि बीमा व्यवस्थापन सूचना प्रणाली मार्फत स्वास्थ्य बीमा बोर्डमा पेश गर्नु पर्दछ । यसरी पेश गरेका दाबीहरू स्वास्थ्य बीमा बोर्डबाट नियमानुसार परिक्षण गरेपछिमात्र भुक्तानी गर्ने गरिएको छ ।
आ.व. २०७८/०७९ मा विगत वर्षका बाँकी रहेका १९लाख ९ हजार ५७ संख्याका दाबी र चालु आ.व.का दाबी ३३ लाख ७५ हजार ८३७ गरि कुल ५२ लाख ८४ हजार ८९४ संख्याका दाबीहरू परिक्षण गरि ८ अर्ब १३ करोड रुपैंया भुक्तानी भैसकेको बोर्डले जनाएको छ ।
आगामी आ.वमा भुक्तानीलाई बैज्ञानिक प्रविधि अपनाई परिक्षण गर्ने तयारी भैरहेको र चालु आ.वको जेष्ठ १५ गते सम्मको १८ लाख ५३ हजार ९ सय ५३ वटा दाबीलाई प्राथमिकताका साथ परिक्षण गर्ने कार्य भैरहेको बोर्डको भनाइ छ ।
तपाईँको अभिमत