एक वर्षभित्र २००० स्वास्थ्य जनशक्ति सरकारी स्वास्थ्य क्षेत्रमा थपिनेछन् : स्वास्थ्य मन्त्री पौडेल

एक वर्षभित्र २००० स्वास्थ्य जनशक्ति सरकारी स्वास्थ्य संस्थामा थपिने भएका छन् । स्वास्थ्य तथा जनसङ्ख्या मन्त्री प्रदिप पौडेलले आगामी एक वर्षभित्रमा सो सङ्ख्यामा सरकारी स्वास्थ्य क्षेत्रमा जनशक्ति थपिने बताउनुभएको हो ।

शनिबार नेपाल स्वास्थ्य अनुसन्धान परिषद् (एनएचआरसी)ले आयोजना गरेको ११औं स्वास्थ्य तथा जनसङ्ख्या वैज्ञानिकहरूको शिखर सम्मेलनको समापन समारोहलाई सम्बोधन गर्नुहुँदै उहाँले यस्तो उद्घोष गर्नुभएको हो ।

‘ओएनएमको सैद्धान्तिक स्वीकृति आइसकेको छ’, उहाँले भन्नुभयो, ‘एक वर्षभित्रमा कम्तिमा दुई हजार जनशक्ति स्वास्थ्य क्षेत्रमा थपिने कुरा म यहाँहरूका बिचमा उद्घोष गर्न चाहन्छु ।’ उहाँले नीतिगत तवरबाट प्रोत्साहित गर्ने कार्य गरिने विश्वास दिलाउनुभयो । आगामी आर्थिक वर्ष २०८२/०८३ मा स्वास्थ्य अनुसन्धानलाई थप व्यवस्थित गरिने पनि उहाँले उद्घोष गर्नुभयो । 

मन्त्री पौडेलले अनुसन्धानको प्रणालीलाई आगामी आर्थिक वर्ष नै सातै प्रदेशमा लाने गरी बजेट व्यवस्था गरिने बताउनुभयो । ‘यो अनुसन्धानात्मक प्रणालीलाई आगामी वर्षको बजेटमा सातै प्रदेशमा लगिनेछ’, उहाँले भन्नुभयो, ‘यो कुरा आगामी बजेटमा प्रतिविम्बित हुनेछ ।’

मन्त्री पौडेलले आफू मन्त्रालय आएपछि मात्र स्वास्थ्य क्षेत्र बृहत् भएको कुरा थाहा भएको भन्नुहुँदै विशेष अध्ययन अनुसन्धानको खाँचो रहेको बताउनुभयो । ‘स्वास्थ्य क्षेत्र एकदमै ठूलो रहेछ, मन्त्री भएपछि थाहा पाएँ । यस क्षेत्रलाई पूर्ण क्षमतामा सञ्चालन गर्न तत्अनुसार दरबन्दी दिन सकेका छौँ त ?’, उहाँले प्रश्न गर्नुभयो । 

यस क्षेत्रमा धेरै कुरा गर्न जरुरी रहेको बताउनुहुँदै उहाँले दरबन्दी र आर्थिक प्रोत्साहन पनि दिइदै लगिने उद्घोष गर्नुभयो ।