फेरि बढ्यो वायु प्रदुषण, अनावश्यक बाहिर ननिस्कन आग्रह
काठमाडौं । बिहीबार साँझ पुर्वी तथा मध्य नेपालमा भएको वर्षाले केही सफा देखिएको देशको वायुमण्डल फेरि धमिलिएको छ । देशभरको वायु प्रदुषण फेरि बढेको छ ।
वातावरण विभागको तथ्याङ्कअनुसार सोमबार बिहान सबैभन्दा धेरै वायु प्रदुषण धनगढीमा छ । धनगढी एयर क्वालिटी इन्डेक्स (एक्युआई) ४२९ पुगेको छ भने दोस्रो नम्बरमा चितवनको भरतपुरमा एक्युआई ३९८ छ । यस्तै तेस्रो नम्बरमा ललितपुरको भैंसेपाटीमा एक्युआई ३२५ छ ।
वायुको गुणस्तर एयर क्वालिटी इन्डेक्स (एक्वुआई)मा मापन गरिन्छ । एक्वुआई ५० सम्मलाई राम्रो मानिन्छ । विज्ञहरूले अत्याधिक डढेलो, कमजोर पश्चिमी वायु र धुँवा–धुलो तथा वर्षा नभएकाले प्रदुषण बढेको बताउदै आएका छन् ।
गत हप्ता प्रदुषण बढ्दा आँखा पोल्ने, पिरो हुने लगायतका स्वास्थ्य समस्या देखिएपछि सरकारले ४ दिन देशभरका विद्यालयहरु बन्द गरेको थियो । वायु प्रदुषणमा हानीकारक रसायनहरु हुने भएकाले आँखा तथा फोक्सोको क्यान्सरसमेत हुने जोखिम रहेको अनावश्यक बाहिर ननिस्कन विज्ञहरुले सुझाव दिएका छन् ।
दीर्घ रोगीहरुलाई वायु प्रदुषणले झनै असर गर्ने भएकाले उनीहरुको विशेष ख्याल राख्न पनि विज्ञहरुले सचेत गराएका छन् ।
तपाईँको अभिमत