स्वाब लिँदा भएको कमजोरीले बिरामीको ब्रेनमा गम्भीर असर

काठमाडौं । अमेरिकामा कोरोना भाइरस रोगको पहिचानका लागि स्वाब संकलनका क्रममा भएको कमजोरीले एक महिलाको ब्रेनमा गम्भीर असर पुगेको तथ्य खुल्न आएको छ । स्वाब लिने क्रममा ब्रेनको धर्कामा छोइ नाकबाट तरल पदार्थ चुहिएको र यसले ब्रेनमा दीर्घकालिन संक्रमणको जोखिम बढाएको अध्ययनले देखाएको छ । 

४० वर्षकी महिलामा यस्तो समस्या देखिएको चिकित्सकहरुले बताएका छन् र यस तथ्यलाई टाउको तथा घाँटी सर्जरी सम्बन्धी अनुसन्धान र अध्ययन गर्ने जर्नल जामामा प्रकाशित गरिएको छ । 

प्रकाशित अध्ययनको वरिष्ठ लेखक जारेट वाल्शले यस घटनाले स्वाब संकलन गर्दा स्वास्थ्यकर्मीहरुले पूर्ण सावधानी अपनाउनुपर्ने पाठ सिकाएको बताउनुभयो । यस्तो अब घटना दोहोरिन नदिन स्वाब संकलन गर्ने स्वास्थ्यकर्मीलाई अनिवार्य तालिम दिनुपर्ने सुझाव अध्ययनमा औंल्याइएको छ । 

सर्जरी गर्नुपूर्व ती महिला स्वाब परीक्षणका लागि अस्पताल जानुभएको थियो । स्वाब निकालेपछि महिलाको नाकको एक भागबाट तरल पदार्थ बगिरहेको देखियो । त्यसपछि महिलालाई टाउको दुख्ने, बान्ता हुने, घाँटी दुख्ने, आँखा नदेख्ने जस्ता समस्या थपिएपछि विशेष केयर युनिटमा राखी उपचार गरिएको थियो । अहिले महिलाको अवस्था सामान्य रहेको जनाइएको छ । 

"इलेक्टिभ सर्जरी गर्नुअघि ती महिलाले दोस्रो पटक स्वाब दिनुभएको थियो । पहिलो पटकको समयमा स्वाब दिँदा भने उहाँलाई कुनै पनि समस्या देखिएको थिएन तर दोस्रो पटक स्वाब निकाल्ने क्रममा सायद सावधानी अपनाइएको थिएन, वाल्शले भन्नुभयो, "स्वाब स्टिक नाकको धेरै भित्र पसाइएको थियो, जसले ब्रेनको धर्काेलाई छोई प्वाल बनायो र ब्रेनमा तरल पदार्थ चुहियो ।" 

महिलाको धेरै वर्ष अगाडि पनि मस्तिष्कमा उच्च रक्तचाप (इन्ट्राकानियल हाइपरटेन्सन) बढेपछि उपचार गरिएको थियो । मष्तिष्कमा एक प्रकारको तरल पदार्थ हुन्छ जसले मष्तिष्कलाई सन्तुलित राखी जोगाउँछ।  

वाल्शका अनुसार महिलामा यस्तो समस्या देखिनुमा स्वाब निकाल्ने क्रममा ब्रेनको लाइनमा छोएको र त्यसपछि संक्रमणले यस्तो अवस्था सृजना भएको हो ।