७७ वटै जिल्लामा डेंगीको जोखिम, २०२३ सुरु भएपछि भेटिए १,१९२ केस

७७ वटै जिल्लामा डेंगीको संक्रमण देखिएको छ । यसको मतलव ७७ वटै जिल्लामा डेंगीको भाइरस कायम रहेको विज्ञहरुले बताएका छन् । जसका कारण यो वर्ष पनि डेंगु संक्रमणको उच्च जोखिम देखिएको छ । २०२३ सुरु भएयता ६६ वटा जिल्लाबाट असार २३ गतेसम्म एक हजार १९२ डेंगीका केस देखिसकेको स्वास्थ्य सेवा विभाग इपीडीमियोलोजी तथा रोग नियन्त्रण महाशाखाले जानकारी दिएको छ । 

डेंगी संक्रमण रोकथाम तथा नियन्त्रण विषयमा इपीडीमियोलोजी तथा रोग नियन्त्रण महाशाखाले सञ्चारकर्मीसँग अन्तरक्रिया कार्यक्रम आयोजना गरेको थियो । 

उक्त कार्यक्रममा प्रस्तुती राख्दै महाशाखाका निर्देशक डा. रुद्र मरासिनीले यो वर्ष पनि डेंगीको जोखिम कायमै रहेको जानकारी दिनुभयो । डा. मरासिनीका अनुसार डेंगी जुलाई महिनाबाट सुरु भएर सेप्टेम्बर महिनामा उच्च विन्दुमा पुग्ने गर्छ । 

यो रोग एडिज जातको लामखुट्टेले सार्ने गर्छ । यसले आफ्नो जीवनचक्रमा ८०० देखि १००० वटासम्म अण्डा पार्छ । संक्रमित लामखु्ट्टेले पारेको अण्डाबाट जन्मिने लामखुट्टेमा पनि डेंगी संक्रमण हुने गर्छ र यिनले मान्छेमा डेंगी सार्ने छन् । 

जमेको पानीमा लामो समयदेखि डेंगी संक्रमित लामखुट्टेका अण्डा रहेको हुनसक्ने भएकाले त्यस्तो पानी नष्ट गर्नुपर्ने डा. मरासिनीले बताउनुभयो । 

जथाभावी राखिएका पुराना टायर, ड्रम, घरको छतमा फालिएका पानी जम्न सक्ने साना वस्तुहरू, फूलदानी, गमला, प्लास्टिकका वट्टा आदिमा जमेको पानीमा लामखुट्टेले फुल पार्ने र त्यसबाट डेंगी फैलने धेरै जोखिम हुने डा. मरासिनीको भनाइ छ। 

त्यसरी जमेको पानी पोखेर लामखुट्टेका फुल तथा लार्भा नष्ट गर्नुपर्ने उहाँले बताउनुभयो । 

डेंगी लागिसकेपछि यसको औषधि समेत नभएकाले लामखुट्टेको बासस्थान  खोजेर नष्ट अभियान नै डेङ्गु नियन्त्रणको प्रमुख उपाय रहेको डा. मरासिनीको भनाइ छ ।