‘नाबालिगको डिम्ब खरिद’ घटनामा मुद्दा नचलाउने निर्णयले महान्याधिवक्ता भण्डारी विवादमा

महान्याधिवक्ता सबिता भण्डारी ‘नाबालिगको डिम्ब खरिद’ घटनामा विवादित हुनुभएको छ । राजधानीको एक निजी फर्टिलिटी क्लिनिकले दुई जना नाबालिगबाट डिम्ब सङ्कलन गरेको एउटा घटनामा मुद्दा दायर नगर्ने उहाँको निर्णय बाहिरिएसँगै उहाँ विवादमा पर्नुभएको हो ।

जेन जी आन्दोलनपछि महान्यायाधिवक्तामा नियुक्त हुनुभएकी भण्डारीको पनि उक्त क्लिनिकमा आबद्धता रहेको भन्दै स्वार्थको द्वन्द्वसँग हेरेर त्यो निर्णयलाई कानुनी चुनौती दिने कतिपय वकिलहरूले बताएका छन्।

बीबीसी समाचारका अनुसार महान्यायाधिवक्ता भण्डारीले भने उक्त फर्टिलिटी क्लिनिकको एउटा‘पक्ष’ आफू पनि रहेकाले मुद्दा नचलाउने निर्णयमा आफू संलग्न नभएको दाबी गर्नुभएको छ । 

उहाँले आफूले निरन्तर निष्ठाको पैरवी गरेको भन्दै अर्को पक्षलाई चित्त नबुझे कानुनी उपचार खोज्ने बाटो कायमै रहेको बताउनुभयो ।

आरोप लागेका क्लिनिकका सञ्चालक र चिकित्सकहरूलाई गएको असारको अन्त्यमा प्रहरीले पक्राउ गर्दा उहाँहरू हाजिरी जमानीमा रिहा हुनुभएको थियो । त्यस वेला आरोपितहरूका पक्षमा अदालतमा बहस गर्नुभएकी उहाँलाई उक्त क्लिनिकसँग जोडेर प्रहरीले बयान पनि लिएको थियो, जसका क्रममा उहाँले नाबालिगहरूको डिम्ब प्रयोगयोग्य नै नहुने भन्दै क्लिनिकहरूको दोष नै नरहेको जिकिर गर्नुभएको थियो ।