इन्टर्न डाक्टर लगातार ३६ घण्टा ड्यूटीमा, मेडिकल कलेजले फलो गरेनन् गाइडलाइन

मेडिकल कलेजहरुले गाइडलाइन अनुसरण नगर्दा इन्टर्न तथा रेजिडेन्ट डाक्टरहरु लगातार ३६ घण्टासम्म ड्युटीमा खटिन बाध्य भएका छन् । २००७ मा नेशनल गाइडलाइन मेडिकल इन्टर्नशीप बनेको छ । 

नेपाल मेडिकल काउन्सिलको २०६४ बैशाख २५ गते इन्टर्नसीप सम्बन्धी निर्णय गर्दै इन्टर्नशीप गर्ने डाक्टरहरुका लागि गाइडलाइन बनाएको थियो ।

उक्त गाइडलाइनमा इन्टर्न डाक्टरहरुको ड्युटीबारे व्यवस्था गरेको छ । उक्त व्यवस्थाअनुसार नाइट ड्यूटी गरेपछि भोली पल्ट विहान ड्युटी हस्तान्तरण गर्नुपर्ने हुन्छ । साथै विहानको ड्युटीको हकमा ८ बजेदेखि साँझ ५ बजेसम्म ड्युटीको समय तोकिएको छ । 

तर हाल मेडिकल कलेजहरुमा भने लगातार ३६ घण्टा काम लगाइरहेको पाइएको छ । जसका कारण कार्यबोझले तनाव उत्पन्न गराइरहेको इन्टर्न डाक्टरहरुको गुनासो छ । आफूहरु तनावमा हुँदा चाहँदा चाहँदै पनि विरामीलाई गुणस्तरीय सेवा दिन असहज हुने उनीहरुको भनाइ छ । 

मेडिकल कलेजहरुले लगातार ३६ घण्टासम्म काम गर्न लगाएको भन्ने गुनासो आएपछि नेपाल चिकित्सक संघ जुनियर डाक्टरको कमिटिले साउन २९ गते नेपाल मेडिकल काउन्सिललाई ध्यानाकर्षण पत्र बुझाएको थियो । हप्तामा एकदिन र नाइट ड्युटीपछि नाइट अफ दिन मेडिकल कलेजहरुलाई आग्रह गर्नुभएको छ । 

कमिटिका सचिव डा.विकास सिटौलाले गाइडलाइन अनुसार इन्टर्न डाक्टरलाई काममा नलगाउदा कलेजहरुले गुणस्तरीय सेवाबाट जनतालाई बञ्चित गराएको ठहरिने बताउनुभएको छ । उहाँले सिनियर डाक्टरहलाई ड्युटीमा खटाउदा नपेल्न आग्रह गर्दै कलेजहरुले ३६ घण्टा ड्युटीमा लगाउन खोजे त्यसको विरोध गर्न जुनियर डाक्टरहरुलाई आग्रह गर्नुभएको छ । 

ध्यानाकर्षण गराएपछि गाइडलाइनमा तोकेअनुसार व्यवस्थाबारे काउन्सिलले वेवसाइटमा प्रकाशित गरेको छ ।