‘स्वास्थ्यकर्मीहरू परिवारलाई जोखिममा राखिरहेको पो छु कि भनेर डराउँछन्’

काठमाडौं । बिरामीको सुरक्षाका लागि स्वास्थ्यकर्मीको सुरक्षा पहिलो शर्त रहेको चिकित्सकहरूले बताएका छन् । अलेक्जेन्ड्रा श, केल्सी फ्लटलगायतले हालसालै ल्यान्सेट जर्नलमा एक लेख प्रकाशित गर्दै सुरक्षित स्वास्थ्यकर्मीले मात्र राम्रो सेवा प्रदान गर्न सक्ने बताउनुभएकाे हाे ।

अनुसन्धानात्मक लेखका अनुसार बिरामीको उपचारका लागि चिकित्सक शारीरिक तथा मानसिक रूपमा सुरक्षित हुनुपर्छ । यस कुरालाई कोरोना महामारीका बेला देखिएको सुरक्षा चुनौतिले अझ प्रष्ट पारेको लेखमा उल्लेख छ । ‘बिरामीको सुरक्षा स्वास्थ्यकर्मीमाथि कति भर परेको छ भन्ने कुरा कोभिड–१९ महामारीले अझ प्रष्ट पारेको छ’, लेखमा भनिएको छ, ‘स्वास्थ्यकर्मीको सुरक्षाबिना बिरामीको सुरक्षा हुँदैन भन्ने कुरा महत्वका साथ उजागर गर्न जरुरी छ ।’

त्यस्तै स्वास्थ्यकर्मीको उपचार क्षमता उनीहरू कति सुरक्षित छन् भन्ने कुरामा भर पर्ने लेखमा भनिएको छ । बिरामीको सुरक्षित उपचार चाहने सबै सरोकारवालाले स्वास्थ्यकर्मीको सुरक्षामा ध्यान दिनुपर्ने पनि लेखमा उल्लेख छ । कोरोना महामारीको यस्तो बेला धेरै मुलुकले स्वास्थयकर्मीलाई पर्याप्त सुरक्षा व्यवस्था गर्न सकिरहेका छैनन् । जसकारण यसबाट दिनानुदिन स्वास्थ्यकर्मी लगायतको मृत्यु तीव्र रूपमा बढिरहेको छ । त्यसैले अल्पविकसित तथा आय कम भएका मुलुकमा स्वास्थ्य सुरक्षा अपनाउन चुनौतिपूर्ण रहेको लेखमा औँल्याइएको छ ।

कोरोना महामारीमा स्वास्थ्यकर्मीको कार्यक्षेत्रमै भौतिक आक्रमण हुने क्रम बढेको यसअघि एक अध्ययनले देखाएको थियो । यस्ता भौतिक आक्रमणले स्वास्थ्यकर्मीमा भय तथा डर पैदा गराउने लेखमा भनिएको छ । ‘धेरै स्वास्थ्यकर्मीहरू आफूले गरेको कामले आफ्ना परिवारलाई जोखिममा राखिरहेको पो हो कि भनेर डराउँछन्’, लेखमा भनिएको छ, ‘स्वास्थ्यकर्मीको सुरक्षाका लागि तत्काल सरकार तथा सम्बन्धित संस्थाहरूले कदम चाल्नुपर्छ, जसकारण हामी हाम्रा बिरामीलाई सुरक्षित उपचार प्रदान गर्न सक्छौँ ।’