कुटाइ खाने डाक्टरको नाममा आयो अदालतबाट पक्राउ पुर्जी
कुटपिटबाट घाइते भएपछि उपचारका क्रममा डा.साह। फाइल फोटो।
हेल्थपाटी - भाद्र २१, २०७९ ०९:०८ मा प्रकाशित
अ +
अ -
कुटाइ खाने कर्णाली स्वास्थ्य विज्ञान प्रतिष्ठानका डाक्टर करण साहलाई पक्राउ गर्न अदातलले पक्राउ पुर्जी जारी गरेको छ ।
जिल्ला अदालत जुम्लाले डा.साहको नाममा पक्राउ पुर्जी जारी गरेको हो । डा. साहले प्रतिष्ठानमा उपचारका लागि आएका बालकमाथि हिंसा गरेको आरोपमा उजुरी परेको थियो ।
उजुरीका आधारमा जिल्ला प्रहरी कार्यालयले माग गरेपछि अदातलले पक्राउ पुर्जी दिएको हो ।
भदौ २ गते प्रतिष्ठानमै कार्यरत धनबहादुर शाहीले डा.साहमाथि कुटपिट गर्नुभएको थियो । कुटपिटपछि शाहीलाई प्रहरीले पक्राउ गरको थियो ।
छोराको उपचारका विषयमा डाक्टरसँग विवाद हुँदा शाहीले कुटपिट गरेका थिए । उनलाई ४५ दिनको लागि निलम्बित समेत गरिएको थियो ।
शाहीकी श्रीमती आशा हमाल शाहीले भने आफ्ना ६ वर्षीय छोरा पृथकविक्रम शाहीको उपचारमा साहले हिंसा गरेको भन्दै जुम्ला प्रहरीमा भदौ १३ गते जाहेरी दिएकी थिइन् ।
यसै जाहेरीका आधारमा डा.साहको नाममा पक्राउ पूर्जी जारी गरिएको जिल्ला प्रहरी कार्यालय जुम्लाले जानकारी दिएको छ ।
उपचार गर्न अकस्मिक कक्षमा लगिएका छोरालाई डा.साहले उपेक्षित एवं भेदभावपूर्ण व्यवहार गरेकाले बाल हिंसासम्बन्धी कसुर गरेको आरोप जाहेरीमा लगाइएको छ ।
तपाईँको अभिमत