बिरामीको अनुपातमा नर्सिङ जनशक्तिको माग
सरकारी सेवामा आवद्ध नर्सहरूले बिरामीको अनुपातमा नर्सिङ जनशक्तिको माग गरेका छन् । सरकारी सेवामा आवद्ध नर्सहरूको संघ (गोनान)को पहिलो वार्षिक उत्सव तथा साधारण सभामा सहभागी नर्सहरूले गुणस्तरीय सेवा प्रदानका लागि बिरामीको अनुपातमा नर्सको संख्या बढाउनपर्ने बताएका हुन् ।
स्वास्थ्य संस्थाहरू अहिलेपनि २०५० सालको दरबन्दी अनुसार चलिरहेको र कतिपय संस्थामा त्यो पुरानो दरबन्दी पनि रिक्त रहेकाले नर्सलाई बिरामी हेर्ने चाप बढेको नर्सहरूको भनाइ छ ।
कार्यक्रममा स्वास्थ्य तथा जनसंख्या मन्त्रालय नर्सिङ महाशाखा प्रमुख गोमादेवि निरौलाले जबसम्म बिरामीको अनुपातमा नर्स हुँदैनन् तबसम्म गुणस्तरीय सेवा दिन नसक्ने बताउनुभयो । उहाँले नर्सिङ जनशक्तिलाई समायानुकुल बनाउन मन्त्रालय जुटिरहेको बताउनुभयो । नर्सहरूलाई आफ्ना समस्या र आवश्यकताबारे बोल्न अनुरोध गर्दै नर्सिङ पेशालाई मर्यादित बनाउनेतर्फ उहाँको जोड छ ।
नीतिगत तहमा नर्सहरूको सहभागिता न्यून रहेकाले नर्सहरूको समस्या समाधान हुन नसकेको दाबी गर्नुभयो । वीर अस्पतालका निर्देशक डा. भुपेन्द्रकुमार बस्नेतले नर्सहरुको थुप्रै समस्यामध्ये जनशक्ति अभाव एक रहेको बताउनुभयो । उहाँले दरबन्दी अनुसार विज्ञापन खुलाउन र नपुगेको दरबन्दी थप गराउन गोनानले पहल गर्नुपर्ने सुझाव दिनुभयो ।
ट्रमा सेन्टरका मेसू डा. प्रमोद जोशीले भुकम्प र कोभिड महामारीमा नर्सले गरेको कार्यको प्रशंसा गर्नुभयो । वार्षिक उत्सव कार्यक्रममा गोनानकी अध्यक्ष कल्पना श्रेष्ठले सरकारी संस्थामा कार्यरत नर्सहरूको हकहितका लागि गोनानको स्थापना भएको भन्दै आफ्नो पेशागत हकहितका लागि एकजुट हुनपर्नेमा जोड दिनुभयो ।
उहाँले गोनानले अग्रज नर्सहरूलाई सधैं सम्मान गर्दै सल्लाह सुझावलाई मनन गर्ने प्रतिवद्धता जनाउनुभयो । नर्सहरूको वृत्तिविकास र अनुसन्धानमा नर्सको सहभागिता गराउन पहल गर्ने उद्धेश्यले २०७७ साल चैत १८ गते गोनानको जन्म भएको अध्यक्ष श्रेष्ठले स्मरण गराउनुभयो ।
यसैगरी नेपाल नर्सिङ संघ नानकी पूर्व अध्यक्ष एवं गोनानकी परिकल्पनाकार प्रमिला देवानले अग्रज नर्सहरूको ज्ञान र अनुभवलाई आत्मसात गर्दै नयाँ पुस्ता अघि बढ्नुपर्नेमा जोड दिनुभयो । नर्सहरूको हकहितकै लागि गोनानको स्थापना भएको भन्दै उहाँले आफ्ना समस्या राख्न र आवाजलाई बुलन्द पार्न अनुरोध गर्नुभयो ।
कार्यक्रममा नानका सदस्य हरिप्रसाद कोजुले समयानुकुल नर्सको व्यवस्थापन हुनपर्ने बताउनुभयो । ‘गुणस्तरीय नर्सिङ सेवाको मुल आधार बिरामीको अनुपातमा नर्सिङ जनशक्तिको बाँडफाड’ भन्ने नाराका साथ गोनानले वार्षिकत्सव मनाएको छ ।
तपाईँको अभिमत