यही अनुपातमा बिरामीको सङ्ख्या बढ्ने हो भने राज्यले उपचार गर्न सक्दैन : स्वास्थ्यमन्त्री पौडेल

बिरामीको सङ्ख्या अहिलेकै अनुपातमा बढ्दै जाने हो भने राज्यले उपचार गर्न सक्ने अवस्था नहुने स्वास्थ्य तथा जनसङ्ख्या मन्त्री प्रदिप पौडलले बताउनुभयो । आइतबार स्वास्थ्य पत्रकार मञ्च नेपालको नवनिर्वाचित कार्यसमितिलाई मन्त्रालयमा बधाई दिँदै उहाँले यस्तो बताउनुभएको हो ।

राज्यले निरोधात्मक भन्दा उपचारात्मक क्षेत्रमा बढी ध्यान दिएकाले पछिल्लो समय बिरामीको सङ्ख्या बढिरहेकाले सोही अनुपातमा सङ्ख्या बढ्दा राम्रोसँग उपचार गर्न सक्ने अवस्था नरहने उहाँको भनाइ छ ।

‘हामीले बढी उपचारात्मक क्षेत्रमा ध्यान दिए जस्तो छ । निरोधात्मक क्षेत्रमा हामीले काम गरेको स्थिति छैन’, उहाँले भन्नुभयो, ‘यसरी नै बिरामीको सङ्ख्या बढेर जाने हो भने राज्यले जति नै चासो राखे पनि सबै नागरिकलाई उपचार सेवा पूर्ण ढङ्गबाट पु¥याउने अवस्था रहँदैन ।’

राज्यको दायित्व बिरामीलाई उपचार गर्ने हुँदाहुँदै पनि बिरामी नै हुन नदिने उपायमा लाग्नुपर्ने उहाँले बताउनुभयो । ‘कोही पनि रोग लागोस् भनेर कामना गरेको हुँदैन’, उहाँले भन्नुभयो, ‘व्यक्ति त्यतिवेला निरोगी हुन्छ, जुनवेला उसले केके गर्दा निरोगी भइन्छ भनेर जानेको हुन्छ ।’ व्यक्तिले रोगबाट बच्ने उपाय जाने आफै सचेत हुने भन्दै निरोधात्मक चेतनामा लाग्नुपर्ने उहाँको भनाइ छ ।

मन्त्री पौडेलले विशेषगरी मानसिक समस्या ठूलो भएकाले यसबारे सचेत हुनुपर्ने बताउनुभयो । राज्यले मानसिक समस्यालाई व्यवस्थित गर्नका लागि प्राथमिकतामा राख्न नसकेको स्विकार गर्दै उहाँले सचेतना अभियानमा लाग्न जरुरी भएको बताउनुभयो ।

यसैगरी मन्त्री पौडेलले स्वास्थ्य पत्रकार मञ्च नेपाललाई मन्त्रालयले आफ्नो अभिन्न अङ्गकै रूपमा ग्रहण गर्ने प्रतिवद्धता व्यक्त गर्नुभयो । मन्त्रालयले मञ्चसँग मिलेर विभिन्न अभियान गर्ने र त्यसको नीतिगत र व्यवहारिक कुरा व्यवस्थित गर्न तयार रहेको बताउनुभयो ।

यसैबीच मन्त्रालयले सूचनाको प्रवाहमा कहिल्यै कन्जुस्याइँ नगर्ने मन्त्रालयका सचिव हरिप्रसाद मैनालीले प्रतिवद्धता जनाउनुभयो । उहाँले मञ्चसँग मन्त्रालय सहकार्य गर्न सधैँ तयार रहेको बताउनुहुँदै सूचना तथा प्रशासनिक सहयोगका लागि आफू सधैँ तयार रहेको बताउनुभयो ।

मञ्चका नवनिर्वाचित अध्यक्ष भिषा काफ्लेले मञ्च र मन्त्रालयको ध्येय एउटै भएकोले मन्त्रालयलालाई सहजीकरण गरेर अघि बढ्न अनुरोध गर्नुभयो । उहाँले नीतिगत व्यवस्था गरी दिगो सहकार्यको वातावरण बनाउन पनि मन्त्री पौडेलसँग माग गर्नुभयो ।