कोरोना महामारी : इटालीमा पहिलोभन्दा दोस्रो लहर खतरनाक
रोम । इटालीमा कोरोना भाइरसको दोस्रो लहर पहिलोभन्दा खतरनाक देखिएको छ । छोटो समयमै दोस्रो लहरमा मर्नेको संख्या पहिलो लहरमा मरेका बराबर पुगेको अन्तर्राष्ट्रिय सञ्चारमाध्यमले जनाएका छन् ।
इन्स्टिच्यूट फर इन्टरनेसनल पोलिटिकल स्टडिजका अनुसार सेप्टेम्बर १ देखि डिसेम्बर २५ सम्ममा ३५ हजार ४१७ कोरोना संक्रमितको मृत्यु भएको छ । यो संख्या पहिलो लहरमा ज्यान गुमाउनेको संख्या बराबर हो ।
यसअघि फेब्रुअरी २१ देखि अगस्ट ३१ सम्ममा ३५ हजार ३७६ कोरोना संक्रमितले ज्यान गुमाएका थिए । यो समय इटाली युरोपको इपिसेन्टरका रुपमा रहेको थियो भने संक्रमण र मृत्युदर उच्च थियो ।
डिसेम्बरमा पनि प्रतिदिन मृतक संख्या बढेर ६ सय देखि ८ सयसम्म पुगेको छ । संक्रमण फैलावटलाई रोक्न इटालीमा क्रिस्टमसदेखि नयाँ वर्षसम्म पनि यात्रामा प्रतिबन्ध लगाइएको छ । तर मृतक संख्या भने घटेको छैन ।
यस्तो हुनुमा स्थानीय स्वास्थ्य पूर्वाधारमा सुधार नगरिनु कारक रहेको मिलान मेडिकल एसोसिएसनका निर्देशक कार्लो अल्बर्टो रोजीले बताउनुभयो । ‘स्थानीय स्वास्थ्य प्रणालीलाई पर्याप्त सुधार गरिएको छैन’, उहाँले भन्नुभयो, ‘पहिलो लहरका बेला हामीले खास उपायहरू अवलम्बन गर्न भनेका थियौँ ती आंशिक रुपमा मात्र गरिए ।’
तपाईँको अभिमत