ट्रमा सेन्टरमा १० घण्टा लामो शल्यक्रिया गरी जोडियो छिनेको हात

काठमाडौं । दुर्घटना भई हात छिनेको अवस्थामा राष्ट्रिय ट्रमा सेन्टरमा भर्ना भएका एक बिरामीको १० घण्टा लामो शल्यक्रियापछि हात जोड्न सफलता मिलेकाे छ । सर्लाहीको पर्सा गाउँपालिका २ का १८ वर्षका रवि सिंह दक्षिणकालीस्थित एक कारखानामा काम गर्ने क्रममा फ्लेक्स पाइप मेशिनले दाहिने हत्केला पुरै छिनालेको अवस्थामा आकस्मिक कक्षमा भर्ना हुनुभएको थियो  ।

अस्पतालका प्लाष्टिक सर्जरीका प्रमुख प्रा.डा.पीयूष दाहालको नेतृत्वमा प्लाष्टिक सर्जनहरु डा. कृष्ण मानन्धर, डा. अपार लामिछाने, डा. कलमराज पाठक तथा एनेस्थेसियाका डा. रुपेश यादव, डा.छिरिङ शेर्पा र नर्सहरु पिङ्की लागेजु र अनुपमा फुयाँलको संलग्नतामा १० घण्टा लगाएर सफल शल्यक्रिया गरिएको अस्पतालका मेडिकल सुपरिण्टेन्डेन्ट डा.सन्तोष पौडेलले जानकारी दिनुभयो ।

उहाँले बिरामी भर्ना भएकै दिन साँझ ७ बजे देखि लगातार १० घण्टा लगाएर शल्यक्रिया गरि छिनेको हात जोड्न सफल भएको  र साउन २२ गते डिस्चार्ज गरिएको बताउनुभयो । पौडेलका अनुसार ती बिरामी असार २९ गते दुर्घटना भई अस्पताल भर्ना हुनुभएको थियो र हाल फिजियोथेरापी विधिबाट उपचार गरिरहनुभएको छ ।

"यो एउटा जटिल अप्रेशन रहेको र पुरै छिनेको हातलाई जोड्न हड्डी, नसा, मासुसम्मको अवस्थालाई हेरेर गर्नुपर्छ", मेसू पौडेलले भन्नुभयो, "यो उपचार संवेदनशील र जटिल थियो, १० घण्टा लगाएर हामीले सफलता हात पारेका छौँ, सबैका लागि यो खुशीको कुरा हो ।"

यस्तै उपचार गराइरहनुभएका सिंहले दुर्घटनापछि हातको आस नगरेको आफूले चिकित्सकहरुको अथक प्रयासले आफ्नो हात फिर्ता पाएकोमा खुशी हुँदै उपचारमा संलग्न सबैलाई धन्यवाद दिनुभयो ।  एक महिनाअघि नै बिरामीको डिस्चार्ज गरिए पनि हातको फङ्सनल रिजल्ट राम्रो भएपछि अस्पतालले यसबारे आज सार्वजनिक गरेको हो ।