कोरोनाका कारण विश्वभर ७ हजार स्वास्थ्यकर्मीको मृत्यु
लन्डन । हालसम्म विश्वभर कम्तिमा ७ हजार कोभिड–१९ संक्रमित स्वास्थ्यकर्मीको ज्यान गएको एमनेस्टी इन्टरनेशनलले जनाएको छ। एमनेस्टीले बिहीबार एक अध्ययन विश्लेषण प्रकाशित गर्दै यति धेरै मृत्युदर हुनु भयानक संकट भएको जनाएको छ।
‘अरूलाई बचाउने क्रममा ७ हजारभन्दा बढीको ज्यान जानु भनेको अत्यन्तै खतरनाक संकट हो’, एमनेस्टीका अर्थ तथा सामाजिक न्याय विभागका प्रमुख स्टीभ ककबर्नले भन्नुभएको छ, ‘हरेक स्वास्थ्यकर्मीसँग कार्यस्थलमा बचेर काम गर्ने अधिकार रहन्छ, तर यहाँ धेरैले ठूलो मूल्य चुकाइरहेका छन्।’
उक्त अध्ययनका अनुसार सबभन्दा बढी मेक्सिकोमा १ हजार ३२० को ज्यान गएको छ। मेक्सिकोपछि अमेरिकामा सबभन्दा बढी १ हजार ७७ जना स्वास्थ्यकर्मीले ज्यान गुमाएका छन्। त्यस्तै ब्राजिलमा ६३४ स्वास्थ्यकर्मीले ज्यान गुमाएका छन् भने भारतमा ५७३ को ज्यान गएको छ। दक्षिण अफ्रिकामा २४० को ज्यान गएको छ।
स्वास्थ्यकर्मीको मृत्युदर मेक्सिको, ब्राजिल तथा अमेरिकामा अत्यन्तै भयानक देखिएको छ। त्यसैले तीव्र रूपमा भाइरस फैलिरहेका भारत तथा दक्षिण अफ्रिका लगायतका मुलुकले बेलैमा स्वास्थ्यकर्मीको जीवन रक्षाका लागि कार्य गर्नुपर्ने सुझाव एमनेस्टीले गरेको छ।
तपाईँको अभिमत