स्वास्थ्यकर्मीलाई दुर्व्यवहार गर्नेलाई पाता फर्काएर जेल हाल्छु : सिडिओ (भिडियोसहित)
काठमाडौं । काठमाडौंका प्रमुख जिल्ला अधिकारी (सिडिओ) जनकराज दाहालले स्वास्थ्यकर्मीलाई दुर्व्यवहार गर्नेलाई पाता फर्काएर ६ महिना जेल हाल्ने चेतावनी दिनुभएको छ । नेपाल टेलिभिजनसँग कुरा गर्दै प्रमुख जिल्ला अधिकारी दाहालले स्वास्थ्यकर्मीलाई दुर्व्यवहार र अवरोध गर्ने जो सुकैलाई खोजी खोजी ६ महिना जेल हाल्ने चेतावनी दिनुभएको हो ।
उहाँले त्यस्ता व्यक्तिलाई खोजीखोजी संक्रामक रोग ऐन, २०२० अन्तर्गत कारबाही गर्ने चेतावनी दिनुभएको हो । ‘सोच्न पनि नसकिने महापराध गरिएको छ,’ उहाँले भन्नुभयो, ‘स्वास्थ्यकर्मी र सुरक्षाकर्मी भगवान हुन्, त्यस्तालाई रोक्नेलाई पाता फर्काएर ६ महिना जेल हाल्छु । मैले सुरक्षाकर्मीलाई पक्राउ गर्न निर्देशन दिइसकेको छु ।’
मध्य बानेश्वरस्थित सिभिल अस्पतालका स्वास्थ्यकर्मीलाई राखिएको भन्दै शनिबार स्थानीयले त्यहाँको होस्टेल घेराउ गर्दै सञ्चालकलाई धम्की दिएका थिए । स्वास्थ्यकर्मीमाथि विभिन्न स्थानमा पटक–पटक दुर्व्यवहार हुँदै आएको छ ।
कोरोनाको महामारीमा ज्यानलाई दाउमा राख्दै बिरामीको उपचार गरिरहेका स्वास्थ्यकर्मीमाथि भएको यो अमानवीय गतिविधिको चौतर्फी विरोध भएको छ । यस्ता निन्दनीय गतिविधिमा संलग्न जो कोहीलाई कारबाही गर्न हेल्थपाटी डटकम जोडदार माग गर्दछ ।
तपाईँको अभिमत