एकै दिन अहिलेसम्मकै उच्च १२ हजार २४७ पीसीआर परीक्षण
परीक्षणकाे १० प्रतिशत पोजेटिभ देखिए परीक्षण नीति बदल्ने
काठमाडौं । पछिल्लो २४ घण्टामा देशभर अहिलेसम्मकै धेरै पीसीआर परीक्षण भएको छ । स्वास्थ्य तथा जनसंख्या मन्त्रालयका अनुसार पछिल्लाे २४ घण्टामा १२ हजार २४७ जनाको पीसीआर परीक्षण गरेको छ । उक्त परीक्षणमध्ये ६४१ जनालाई कोरोना पोजेटिभ देखिएको छ । हाल ३८ वटा प्रयोगशालाबाट पीसीआर परीक्षण भइरहेको छ । स्वइच्छाले पीसीआर परीक्षणको अनुमति दिएपछि केही दिनयता पीसीआर गराउनेहरुको संख्या पनि बढेको छ ।
स्वास्थ्य तथा जनसंख्या मन्त्रालयका प्रवक्ता प्रा.डा. जागेश्वर गौतमले पीसीआरको दायरा बढिरहेको र आवश्यक परे दैनिक २२ हजार जनासम्मको परीक्षण गर्न सक्ने क्षमता रहेको बताउनुहुन्छ । संक्रमण देखिएको सुरुवातीमा एक जनाको पीसीआर परीक्षण गराउन हङकङ पठाएको सम्झदै उहाँले भन्नुभयो, “देशमा हाल ३८ वटा प्रयोगशालाबाट दैनिक २२ हजार जनासम्मको परीक्षण गर्नसक्ने अवस्थामा आउन सफल भएका छौँ, आवश्यकता हेरेर पीसीआर परीक्षण गर्ने हो नि उहाँले थप्नुभयो, परीक्षणलाई प्राविधिक र आर्थिक पक्षबाट पनि हेर्नुपर्छ नि।”
गौतमका अनुसार परीक्षण गरिएकामध्ये १० देखि १२ प्रतिशतभन्दा बढीलाई पोजेटिभ देखियो भने परीक्षणको दायरा बढाउनु तथा नीति बदल्नुपर्छ तर हालको पोजेटिभ दर ६ प्रतिशतभन्दा माथि गएको छैन । कोरोना उपचार, रोकथाम तथा व्यवस्थापनलाई प्राथमिकतामा राखेर नै अगाडि बढिरहेको दाबी गर्दै उहाँले भन्नुभयो, “एक जनाको पीसीआर परीक्षण गर्दा ५ हजार ५ सय रुपैयाँ खर्च हुन्छ, प्राथमिकतामा परेकालाई सरकारले निशुल्क परीक्षण गरिरहेको छ।”
देशभर साउन ३१ गते ११ हजार ४७ जनाको पीसीआर परीक्षण भएकोमा ४६८ जनामा कोरोना पुष्टि भएको थियो । साउन २९ गते ९ हजार ८५९, साउन २८ गते १० हजार ४८१, साउन २७ गते १० हजार ४६२, साउन २६ गते ८ हजार ४३२ र साउन २५ गते ८ हजार ५१५ जनाको पीसीआर परीक्षण गरेको थियो ।
पछिल्लो आँकडा अनुसार देशभर २६ हजार ६६० जनालाई कोरोना पुष्टि हुनुका साथै १०४ संक्रमितको मृत्यु भएको छ । यसैगरी संक्रमण पुष्टि भएकामध्ये १७ हजार ३३५ निको भएर डिस्चार्ज भएका छन् भने हाल देशभर सक्रिय संक्रमितको संख्या ९ हजार २२१ रहेको छ ।
तपाईँको अभिमत