काठमाडौंमा ट्याम्पो चालकलाई कोरोना, ३ दिनसम्म यात्रु बोकेका थिए
काठमाडौं । काठमाडौंमा सफा ट्याम्पो चालकलाई कोरोना भाइरस रोग (कोभिड - १९) पुष्टि भएको छ । नेपाल यातायात स्वतन्त्र मजदुर संगठनका अध्यक्ष भिमज्वाला राईले शनिबार ४५ वर्षका पुरुष ट्याम्पो चालकलाई कोरोना पोजेटिभ पुष्टि भएको जानकारी दिनुभयो । उहाँका अनुसार संक्रमित चालक लकडाउन भएपछि सुदुरपश्चिम जानुभएकोमा ४ दिनअघि मात्रै काठमाडौं आउनुभएको र फर्कने क्रममा उहाँकाे नागढुंगा नाकामा स्वाब संकलन गरिएको थियो ।
चालककाे स्थायी घर बारा रहेकाे छ । काेराेना पुष्टी भएपछि उहाँलाई जिल्ला अस्पताल भक्तपुरकाे आइसोलेसनमा राखिएकाे राईले जानकारी दिनुभयाे । स्वाब संकलन गरेपछि ती चालकले ३ दिनसम्म शंखमुल रुटमा ट्याम्पो चलाउनुभएको थियो । शनिबार पनि ट्याम्पो चलाउदै गर्दा उहाँको रिपोर्ट पोजेटिभ रहेको जानकारी ईपिडिमियोलोजी तथा रोग नियन्त्रण महाशाखाले गराएकाे थियो । हालसम्म नेपालमा २ जना यातायात व्यवसायीलाई कोरोना पुष्टि भएको छ,जसमा एक जनाको मृत्यु भइसकेको छ ।
सरकारले असार २६ गतेदेखि उपत्यकाभित्र तीन जिल्ला र बाहिरको हकमा जिल्लाभित्र सार्वजनिक सवारी सञ्चालनमा ल्याउने निर्णय गरेकाे थियो । भदौ १ गतेदेखि लामो दुरीका सवारी साधन सञ्चालनमा ल्याउने निर्णय पनि सरकारले गरिसकेको छ ।
तपाईँको अभिमत