कोरोना उपचार गर्ने स्वास्थ्यकर्मी, भेन्टिलेटर र आइसीयू अभाव

नारायणी अस्पतालमा कार्यरत डाक्टर, नर्ससहित २८ जनालाई कोरोना

काठमाडौं । समुदायमा संक्रमण फैलिएको वीरगञ्जको स्थिति थप भयावह बन्दै गएको छ । केही दिनयता वीरगञ्जमा कोरोना संक्रमितको मृत्यु हुने क्रम बढिरहेको छ । साथै संक्रमितको संख्या पनि बढ्दै गएको छ । संक्रमितको संख्या बढेपछि कोरोनाको उपचार गरिरहेको नारायणी र अस्थायी कोभिड गण्डक अस्पतालले स्वास्थ्यकर्मी, भेन्टिलेटर र आइसीयूको अभाव झेलिरहेका छन् । 

कोरोना संक्रमितको उपचार गरिरहेको गण्डक अस्पतालमा ६१ जना संक्रमित उपचाररत छन् । जहाँ १० जना आइसीयू र ३ जना भेन्टिलेटरमा छन् । त्यहाँ अन्य संक्रमितका लागि आइसीयू र भेन्टिलेटर खाली छैनन् । गण्डकमा रहेका ६० प्रतिशत संक्रमित लक्षणसहितका छन् । 

यस्तै उपचारमा खटिएका नारायणी अस्पतालमा कार्यरत डाक्टर, नर्ससहित २८ जनालाई कोरोना पुष्टि भएपछि उपचारमा समस्या भएको छ । अस्पतालका मेडिकल सुपरिटेन्डेन्ट डा.मदनकुमार उपाध्यायले ८ डाक्टर, ६ नर्स, ४ पारामेडिक्स, कार्यालय सहयोगी ३, स्वीपर ५, प्रशासनका १ र १ एम्बुलेन्स चालकलाई कोरोना पुष्टि भएको जानकारी दिनुभयो । 

संक्रमण पुष्टि भएका सबै स्वास्थ्यकर्मी आइसोलेसनमा रहेको उहाँले बताउनुभयो । 'स्वास्थ्यकर्मीहरुको अभाव भएको छ, स्रोत र साधनको अपुग छ, यहाँको स्थिति भयावह छ', उपाध्यायले भन्नुभयो, ६१ जनामात्रै अस्पतालमा हाे अरु घरमानै हुनुहुन्छ । वीरगञ्जमा २ सय बढी संक्रमित रहेको उहाँले बताउनुभयो ।