कार्यकक्षमै स्वास्थ्यकर्मीमाथि कुटपिट, सुरक्षाको माग राख्दै ओपिडि सेवा बन्द
काठमाडौं । बाजुराको बुढीनन्दा नगरपालिकामा रहेको प्राथमिक स्वास्थ्य केन्द्र कोल्टीमा अहेव सिंहराज गिरीमाथि दुर्व्यवहारसहित कुटपिट भएको छ । स्वास्थ्य केन्द्रका प्रमुख मेडिकल अधिकृत डा. राजुराज जैशीले नियमित सञ्चालनमा रहेको आकस्मिक कक्षमा साउन ११ गते राती करिव ११ः१५ बजेतिर स्वास्थ्य परीक्षण गर्नुपर्यो भन्दै आएका स्थानिय केही व्यक्तिहरुले सिंहलाई गालिगलौज गरि कुटपिट गरेको जानकारी दिनुभयाे ।
बुढीनन्दा नगरपालिका वडा नं. ६ स्थायी ठेगाना भएका केसर भाटको नेतृत्वमा आएका व्यक्तिहरुले कार्यकक्षमै कुटपिट गर्दा सिंहको हात भाँच्चिएको जैशीले बताउनुभयो । जैशीले विज्ञप्ती निकालेर घटनाप्रति खेद प्रकट गर्दै घाइते स्वास्थ्यकर्मीले उचित न्याय नपाउन्जेल र स्वास्थ्यकर्मीहरुको सुरक्षाको प्रत्याभुती नभएसम्म अनिश्चितकालका लागि ओपीडी सेवा बन्द गरिएको जानकारी गराउनुभएको छ ।
विज्ञप्तीमा भनिएको छ,कोभिड- १९ को विश्वव्यापी महामारी फैलिरहेको यस विषम परिस्थितीमा रातदिन नभनी खटिरहेका स्वास्थ्यकर्मीहरु माथि गरिएको अमानविय क्रियाकलापहरु प्रति घोर भत्सर्ना र निन्दा गर्दै घटनाको सत्यतथ्य छानविन गरी घटनामा संलग्न जो काेहीलाई अविलम्ब कानुनी कारबाही गर्न यस प्राथमिक स्वास्थ्य केन्द्र कोल्टी माग गर्दछ ।
तपाईँको अभिमत