टेकु अस्पतालका चिकित्सक,नर्स तथा कर्मचारीले पाए जोखिम भत्ता

काठमाडौं । देशभरका अस्पताल र स्वास्थ्य संस्थाहरुमा कार्यरत चिकित्सक र स्वास्थ्यकर्मीहरुले सरकारले घोषणा गरे अनुरुप जोखिम भत्ता नपाएको गुनासो गरिरहँदा शुक्रराज ट्रपिकल तथा सरुवा रोग अस्पताल टेकुका कर्मचारीहरुले जोखिमभत्ता पाएका छन् ।

गत माघदेखि नेपालमा कोभिड –१९ को पहिलो संक्रमितको उपचार गरेको अस्पतालका चिकित्सक, नर्स, स्वास्थ्यकर्मी तथा कर्मचारीहरुले माघदेखिकै जोखिम भत्ता पाएका हुन् । असहज अवस्थामा जोखिम मोलेर काम गरिरहेका चिकित्सक, स्वास्थ्यकर्मी र अन्य जनशक्तिहरु भत्ता प्राप्त गरेपछि थप उत्साहित हुने अस्पतालका निर्देशक डा. सागरकुमार राजभण्डारीले बताउनुभयो । 

कोरोनाका बिरामीको उपचारमा प्रत्यक्ष र अप्रत्यक्ष रुपमा संलग्न जनशक्तिलाई जोखिम भत्ता उपलब्ध गराउन आवश्यक बजेटका लागि स्वास्थ्य तथा जनसंख्या मन्त्रालयमा अस्पताल प्रशासनले निरन्तर पहल गर्दै आएको थियो । 

‘मन्त्रालयबाट अर्थ मन्त्रालय हुँदै आर्थिक वर्षको अन्तिम समयमा जोखिम भत्ता निकासा भईआएको  र संलग्न कर्मचारीहरुलाई जोखिम भत्ता व्यवस्थापन आदेश, २०७७ बमोजिम शुरु तलव स्केलको ५० देखि १०० प्रतिशतसम्म भत्ता वितरण गरिएको’ अस्पतालका प्रशासन प्रमुख रुपनारायण खतिवडाले बताउनुभयो । 

‘हामीले गत माघदेखि असारसम्मको जोखिम भत्ताको विवरण सहित आवश्यक रकम निकासाका लागि मन्त्रालयमा माग गरेको भए तापनी मन्त्रालयबाट २०७६ माघदेखि २०७७ बैशाखसम्मको रकम मात्र निकासा भएकोले सोही अनुरुप न्यून संख्याका जनशक्तिलाई जेठसम्म र अन्यलाई बैशाखसम्मको भत्ता वितरण गरेका छौ’ खतिवडाले जानकारी दिनुभयो ।

गत आ.व.को बाँकी अवधिको भत्ता समेत यस आ.व.मा सकेसम्म साउन महिनाभित्रै निकासा गराई वितरण गर्ने योजनामा अस्पताल प्रशासन लागिरहेको उहाँको दाबी छ । कोभिड १९ बिरामीहरुको उपचार व्यवस्थापनमा शुरुवातदेखि नै खटिरहेका टेकु अस्पतालका कसैलाई पनि हालसम्म कोरोना भाईरस संक्रमण देखिएको छैन ।

अस्पतालमा व्यक्तिगत सुरक्षा सामग्रीहरुको सहज उपलब्धता र संक्रमण नियन्त्रणमा समेत उच्च सर्तकता अपनाइएका कारण कार्यरत सम्पूर्ण जनशक्तिहरु सुरक्षित रहन सकेको देखिन्छ ।