ह्याम्समा कोरोना संक्रमित एकरात सुतेको ३१ हजार, खर्च धान्न नसक्दा सोल्टी होटलमा सारियो 

काठमाडौं । काठमाडौंको मण्डिखाटारस्थित ह्याम्स अस्पताल नेपालमा कोरोना संक्रमितको उपचार गर्ने पहिलो निजी अस्पताल बनेको थियो । गत जेठ २३ गते अस्पतालमा उपचाररत दुई बिरामीमा कोरोना संक्रमण देखिएपछि एक जनालाई सशस्त्र प्रहरीको अस्पताल पठाइए पनि एकको उपचार ह्याम्समै गरिएको थियो। 

पोखराबाट उपचारका लागि ह्याम्स अस्पतालमा आएका ६० वर्षीय पुरुषमा कोरोना संक्रमण देखिएपछि पनि उपचार खर्च तिरेर सोही अस्पतालमै रहन चाहेको बताइएको थियो । केही दिनमा उपचारपछि ती बिरामी घर फर्किए पनि उनले त्यहाँ के कति खर्च गरे भन्ने कुरा बाहिर आउने कुरै भएन। 

तर ह्याम्स अस्पतालको आइसोलेसनमा बस्ने कोरोना संक्रमितको खर्च निकै अत्यासलाग्दो रहेको खुल्न आएको छ । केही दिनअघि कोरोना संक्रमण पुष्टि भएका नेपाल वायु सेवा निगमका पाइलट र चालक दलका सदस्यहरुलाई ह्याम्स अस्पतालमा राख्दा धानिनसक्नु बिल आएपछि सोल्टी होटलको आइसोलेसनमा सारिएको छ। 

वायु सेवा निगम स्रोतले दिएको जानकारी अनुसार एक दिन आइसोलेसनमा बसेको एक संक्रमितको खर्च ३१ हजारका दरले आएको छ । कुनै लक्षण नदेखिएका र सामान्य अवस्थामा रहेका उनीहरुलाई कुनै उपचार गर्ने कुरै भएन ।  

यही असार २२ गते नेपाल वायुसेवा निगमका पाइलट र चालक दलका सदस्य १४ जनामा कोरोना संक्रमण देखिएको थियो । पहिला उनीहरुलाई बलम्बुस्थित सशस्त्र प्रहरी अस्पतालमा राखिएको थियो । खानपान तथा बसाईको राम्रो व्यवस्था नभएको भन्दै असन्तुष्टि जनाए ।  खान राम्रो नभएको भन्दै खान अस्वीकार गरेपछि पाइलट र  चालक दलका सदस्यहरुलाई सोल्टी होटलबाट समेत खाना लगेर खुवाइएको सशस्त्र प्रहरी अस्पताल स्रोतले जानकारी दियो । त्यति गर्दा पनि उनीहरुले त्यहाँ बस्नै नमानेपछि दुई दिनपछि ह्याम्स अस्पताल लगिएको थियो। 

उनीहरुको उपचार खर्च नियमले नै व्यहोर्ने गरी १४ जनालाई नै ह्याम्स अस्पताल लगिएको थियो । अस्पतालले आइसोलेसनमा कोरोना संक्रमित सुतेको मात्रै खर्च प्रतिदिन ३१ हजारका दरले ४ लाख ३४ हजार तथा तीन दिनको खर्च १३ लाखभन्दा माथि निकाली बिल पेश गरेपछि निगमका अधिकारीहरु आत्तिएको स्रोतको भनाइ छ। 

उनीहरुले त्यति धेरै खर्च निगमले धान्न नसक्ने भएकाले सोल्टी होटलमा आइसोलेसनमा राख्ने गरी चिकित्सकसहित व्यवस्था गरिदिन स्वास्थ्य मन्त्रालयलाई आग्रह गरेपछि २८ गते कोरोना संक्रमित पाइलट र चालक दलका सदस्यहरुलाई सोल्टीमा आइसोलेसनमा बस्ने गरी सारिएको निगम स्रोतले जानकारी दियो। 

 त्यसअघिदेखि नै वायुसेवा निमगका  अन्य कर्मचारीहरु  सोल्टी होटलमै क्वारेन्टाइनमा बस्दै आएका थिए ।  सोल्टीमा संक्रमितलाई आइसोलेट गरेकाे खर्च एकजना बराबर १० हजार भन्दा कम रहेको निगम स्रोतको भनाइ छ । स्रोतका अनुसार ह्याम्समा बस्दा पनि उनीहरुलाई खाना सोल्टी होटलबाटै लगिने गरेको थियो। 

१३ लाख बराबरको बिल निगमले तिर्न नसक्ने भन्दै सो खर्च व्यहोरिदिन आग्रह गर्दै निमगले स्वास्थ्य मन्त्रालयलाई पत्र पठाएको छ । हालसम्म वायु सेवा निगमबाट पत्र आएको भन्ने जानकारी मात्रै पाएको स्वास्थ्य मन्त्रालयका सहसचिव डा. गुणराज लोहनीले बताउनुभयो । ‘पत्र आएर दर्ता भएको भन्ने जानकारी चाँहि पाएका छौं’ लोहनीले भन्नुभयो– ‘के कस्तो आयो थाहा छैन, पत्र हात परेपछि भन्न सकिन्छ ।’ कोरोना संक्रमण देखिएका निगमका पाइलट र चालक दलका सदस्यहरूलाई ह्याम्स अस्पतालबाट सोल्टी होटलमा सार्न अनुमति मागिएको र मन्त्रालयले अनुमति दिएको लोहनीले स्वीकार गर्नुभयो। 

‘सार्न अनुमति मागिएको हो हामीले स्वीकृति दिएका हौं, अरु विस्तृत जानकारी छैन’ डा. लोहनी भन्नुहुन्छ। 

नेपाल वायु सेवा निगमकी प्रवक्ता अर्चना खड्काले पनि ह्याम्स अस्पतालमा निकै महंगो भएकाले सोल्टी होटलमा सारिएको स्वीकार गर्नु भयो । ह्याम्समा कति रकम लिइएको भन्नेबारे भने उहाँले खुलाउनु भएन ।  उपचार खर्च व्यहोर्नका लागि स्वास्थ्य मन्त्रालयमा पत्रचार गरिएको कुरा भने प्रवक्ता खड्काले स्वीकार्नुभयो ।  

‘ह्याम्समा महंगो भएकाले नै सोल्टीमा सारिएको हो । प्रवक्ता खड्काले बताउनुभयो–‘ त्यहाँ हाम्रो पुरानै एग्रीमेन्ट छ । ह्याम्स अस्पतालभन्दा निकै सस्तो पर्छ।’ 

निगमले नै खर्च व्यहोर्ने गरी ह्याम्स अस्पतालमा लगिए पनि त्यहाँको खर्च धान्नै नसक्ने देखिएको उहाँ बताउनु हुन्छ । सोल्टी होटलमा लागेको खर्च निगमले व्यहोर्ने प्रवक्ता खड्काले जानकारी दिनुभयो।