शिक्षण अस्पतालमा कोरोना संक्रमित बिरामीका आफन्तको विजोग

काठमाडौं । त्रिवि शिक्षण अस्पताल महाराजगन्जमा कोरोना बिरामीका कुरुवा अलपत्र परेका छन् । शिक्षण अस्पतालको आइसोसेनमा रहेकी कोरोना सक्रमित हेटौंडाकी महिलाको कुरुवा बसेका उनका श्रीमान र छोरी कता जाने के गर्ने भएर अहिले आपतमा परेका हुन् । 

हेटौंडाबाट मुटुको शल्याक्रियाका लागि शिक्षण अस्पताल परिसरमै रहेको मनमोहन कार्डियो सेन्टरमा आएकी महिलामा पीसीआर परीक्षण गर्दा कोरोना संक्रमण रहेको बिहीबार पुष्टि भएको थियो। त्यसपछि महिलालाई सल्यक्रिया नगरी शिक्षण अस्पतालको आइसोलेसनमा सारियो। 

अस्पतालमा बिरामी महिलाको रेखदेख उनका श्रीमान र छोरीले गर्दै आएका थिए। कोरोना संक्रमितसँग प्रत्यक्ष सम्पर्कमा रहेकाले आफूहरुको पनि पीसीआर परीक्षण गर्ने व्यवस्था मिलाइ दिन शिक्षण अस्पतालका कोरोना फोकल पर्सन डा. सन्तकुमार दाससँग उनीहरुले आग्रह गरे । तर डा.दासले स्वास्थ्य मन्त्रालय वा स्वास्थ्य सेवा विभागको सिफारिस ल्याए मात्रै पीसीआर परीक्षण गर्न मिल्ने झर्कीफर्की गरेको पीडितको आरोप छ। दुवै जना घर गएर बस्न र बिरामी कुर्न अर्काे मान्छे पठाउन डा. दासले आग्रहगर्नु भएको उहाँहरुको भनाइ छ । 

‘गाडी चल्दैन, एम्बुलेन्सले बिरामीबाहेक अरु बोक्न मिलेन कसरी हेटौंडा घर जानु ?’ संक्रमित महिलाका पतिले भन्नुभयो। ‘कोरोना बिरामीसँगै  बसेका मान्छे अन्त हिड्दा अरुलाई पनि जोखिम हुन्छ कुनै उपाय भएन’
आफ्ना समस्या सुनाउँदा दासले आफ्नो काम कोरोनाका बिरामी हेर्नु भएकाले बिरामी कुरुवाको व्यवस्थापन गर्नु नभएको भन्ने जवाफ दिएको पीडित बताउनुहुन्छ । 

संक्रमित बिरामी रहेकाले कुरुवाबिना अस्पतालमा राख्ने अवस्था पनि नभएको उहाँहरुको भनाइ छ । ‘उसको रेखदेख गर्ने हामी नै हो हामी शंकास्पदमा परिसक्यौँ अब अर्को कसलाई कोरोनाको बिरामी कुर्न जा भन्नु ?’ बिरामीका श्रीमान भन्नुहुन्छ। फोकल पर्सन दासले उनीहरुलाई पीसीआर परीक्षण गर्नु नपर्ने कम्तिमा १४ दिन घरमा गएर क्वारेन्टाइन बस्न भन्नुभएको उहाँहरु बताउनुहुन्छ।

यस विषयमा हेल्पाटीले कुरा गर्न खोज्दा डा.सन्तकुमार दासले आफ्नो काम बिरामी कुरुवाको व्यवस्थापन गर्ने नभएको भन्दै आफू मिटिङ रहेकाल अहिले थप कुरा नगर्ने भन्दै पन्छिनुभयो ।यसबारे स्वास्थ्य मन्त्रालयका एक उच्चअधिकारीलाई जानकारी गराउँदा कोरोना संक्रमितसँग प्रत्यक्ष सम्पर्कमा रहेका परिवारका सदस्यलाई त्यस्तो व्यवहार गर्न नहुने बताउनु भयो । ‘अवस्था हेर्दा उनीहरुलाई पनि संक्रमण भएको हुनसक्ने देखिन्छ, उहाँ भन्नुहुन्छ’ फोकल पर्सनकारुपमा खटाइएको चिकित्सकले त्यस्तो गैरैजिम्मेवारी देखाउन मिल्दैन।’ 

त्यहाँ भएका सेवा उपलब्ध गराउने र नभए सम्बन्धित ठाउँमा जान सुझाउन पर्ने मन्त्रालयका अधिकारी बताउनु हुन्छ । ‘त्यसरी संक्रमितको प्रत्यक्ष सम्पर्कमा रहेका बिरामी कुरुवालाई जे मन लाग्छ गर, जहाँ मन लाग्छ जा भन्दा उनीहरुमा पनि संक्रमण रहेछ भने अन्त पनि फैलिएर थप समस्या आउन सक्छ’ ती अधिकारी भन्नुहुन्छ।

अस्पतालको वेवास्तापछि तनाबमा रहेका बिरामी कुरुवा बाबुछोरी अहिले शिक्षण अस्पताल परिसरमै अलपत्र अवस्थामा छन्।