५ स्वास्थ्यकर्मीमा कोरोना, १२ चिकित्सकसहित ६३ जना क्वारेन्टिनमा
राप्ती स्वास्थ्य विज्ञान प्रतिष्ठानकाे सेवा सूचारु
दाङ । राप्ती स्वास्थ्य विज्ञान प्रतिष्ठानमा कार्यरत पाँच स्वास्थ्यकर्मीमा कोरोना संक्रमण पुष्टि भएपछि १२ जना चिकित्सक, ५१ जना स्वास्थ्यकर्मी र कर्मचारीसहित ६३ जना क्वारेन्टिनमा बसेका छन् ।
कोरोना संक्रमितको प्रत्यक्ष सम्र्पकमा आएका १२ जना चिकित्सक सहित ६३ जनालाई क्वारेन्टिनमा राखिएको प्रतिष्ठानले जनाएको छ ।
कोरोना पुष्टि भएका स्वास्थ्यकर्मीलाई आइसोलेशनमा राखिएको छ र उनीहरुको स्वास्थ्य अवस्था सामान्य रहेको प्रतिष्ठानले जनाएको छ । गत शुक्रवार प्रतिष्ठानका अस्पताल निर्देशक, नर्सिङ इन्चार्ज, इमर्जेन्सी वार्डमा कार्यरत एक स्वास्थ्यकर्मी र आइसोलेसन वार्ड इन्चार्जसहित चार जनामा कोरोना संक्रमण पुष्टि भएको थियो ।
४ जना स्वास्थ्यकर्मीलाई कोरोना संक्रमण पुष्टि भएपछि अस्पताल निर्मलीकरणका लागि प्रतिष्ठानले २ दिन आकस्मिक कक्ष बाहेक अस्पतालको सबै सेवा बन्द गरेको थियो । प्रतिष्ठानले दुई सय २४ जना कर्मचारीको कोरोना परिक्षण गरेको छ । दुई सय २४ जना कर्मचारीको स्वाब संकलन गरी कोरोना परिक्षण गर्दा आकस्मिक कक्षमा कार्यरत रोल्पा ७ का २५ वर्षिय कर्मचारीलाई आइतबार कोरोना पोजेटिभ पुष्टि भएको कामु रजिस्ट्रार कैलाश प्रसाद देवले जानकारी दिनुभयो ।
यो सहित दाङमा कोरोना संक्रमितको संख्या दुई सय ७२ पुगेको छ । प्रतिष्ठानले अस्पतालको सेवा आजबाट सूचारु हुने जनाएको छ ।
तपाईँको अभिमत