३९ हजार कोरोना संक्रमितलाई सरकारी अस्पतालले धान्ने

काठमाडौं । स्वास्थ्य तथा जनसंख्या मन्त्री भानुभक्त ढकालले कोरोना उपचारमा नेपालले उल्लेख्य प्रगती गरेको दाबी गर्नु भएको छ ।

शनिबार दिउँसो स्वास्थ्य मन्त्रालयमा पत्रकार सम्मेलन गर्दै मन्त्री ढकालले परीक्षणको दायरा बढाइदै लगिएको बताउनुभयो। थप जनशक्ति थपेर ल्याबलाई २४ घण्टा नै सञ्चालन गर्न सकिने धारण व्यक्त गर्नुभयो। ‘अहिले भइरहेको परीक्षणलाई बढाउन सकिन्छ’ मन्त्री ढकालले भन्नुभयो, ‘बाँकी निजी क्षेत्रले पनि सहयोग गर्न सक्दछ ।’  प्रतिदिन तीनहजार नमुना निजी क्षेत्रबाट थप गर्न सकिने उहाँको भनाइ छ । मन्त्री ढकालले प्रदेशका प्रयोगशालामा दैनिक पनि एक हजार परीक्षण गर्न सकिने जानकारी दिन्भयो । ‘अटो मेसिनले हाम्रो स्तरलाई वृद्धि गर्न सकिन्छ । प्रत्येक प्रदेशमा दैकिन एक हजार रिपोर्ट दिनसक्ने अवस्था आउँछ’ ढकालले भन्नुभयो । 

स्वास्थ्य तथा जनसंख्या मन्त्री भानुभक्त ढकाल

संक्रमित संख्या अझै बढ्न सक्ने सम्भावना रहेको भन्दै उहाँले नेपाल चिकित्सक  संघ, नेपाल नर्सिङ संघ, निजी अस्पताल, नेपाल मेडिकल काउन्सिल लगायतका अध्यक्षहरु रहने गरी कमिटी बनाएको र स्वास्थ्यसँग सम्बन्धित विषयमा प्रोटोकल तयार गर्दा उहाँहरुको पनि राय लिएको जानकारी दिनुभयो ।  स्वास्थ्य मन्त्रालय समिश्रणबाट बनेको जानकारी दिँदै उहाँले डाक्टर भन्नेवित्तिकै एउटै बुझिने गरेको तर त्यहाँ पनि भिन्न विधा  र  भिन्न दृष्टिकोण हुने जानकारी दिनुभयो । ‘जनस्वास्थ्य, प्रशासन, प्राविधिक सबैको समिश्रणबाट मन्त्रालयले काम गरिरहेको छ ।’ मन्त्री ढकालले भन्नुभयो । 

पहिले–पहिले विभाग र अन्य महाशाखा आ–आफ्नै ढंगले सञ्चालन हुने भएपनि अहिले त्यस्तो नभएको उहाँको जानकारी दिनुभयो । कोरोनालाई नियन्त्रण गर्न स्वास्थ्य मन्त्रालय मातहत रहेका सबै निकायको एकीकृत धारणा बनाएर अघि बढेको उहाँको भनाइ छ ।

विधागत हिसाबका असहमति र महत्वकांक्षाले गर्दा पनि समस्या भएको उहाँले दावी गर्नुभयो ।  ‘नउठ्नुपर्ने चर्चा परिचर्चा भइरहेको छ । स्वास्थ्य मन्त्रालयमा आएपछि छिटो छिटो जिम्मेवारी परिवर्तन गरिएको भन्ने पनि छ’ उहाँले प्रष्टिकरण दिदै भन्नुभयो,‘ कर्मचारीतन्त्रमा सरुवा र जिम्मेवारी हेरफेर गर्नु स्वभाविक प्रक्रिया हो ।’

सञ्चारकर्मीको जिज्ञासामा जवाफ दिँदै मन्त्री ढकालले पत्रकारलाई टाढा गर्न खोजिएको नखोजिएको जिकिर गर्नुभयो ।  ‘सबैलाई समान व्यवहार गर्न सकियोस भन्ने उद्देश्य हो ।’ उहाँले भन्नुभयो, ‘३० जना पत्रकारहरुलाई एउटै प्रश्नको जवाफ दिँदा तीन घण्टा जान्छ त्यो बीचमा आफूले अन्य काम गर्न नसक्ने भएकाले पत्रकारसँगको दूरी ठिक राख्नुपर्छ भन्ने भनाइ हो ।’ 

दुई अवस्था आयो भने स्वास्थ्य संकटकालबारे छलफल गर्न सकिने उहाँको धारणा छ ।  विज्ञका अनुसार ३९ हजारसम्म पनि पुग्न सकिन्छ भनेर तयारी गरिरहेको मन्त्री ढकालले जानकारी दिनुभयो । जटिल केु नआएको खण्डमाअस्पताल भन्दा पनि छुटै आइसोलेसन तयार गरेर राख्नु पर्ने धारणा उहाँले व्यक्त गर्नुभयो । ‘त्यसमा चिकित्सकको टिम राख्नुपर्छ । जसरी खरिपाटीमा चीनबाट आएका विद्यार्थीहरुलाई राखिएको थियो, मन्त्री ढकाले भन्नुभयो यसो हुँदा अस्पतालमा बेडहरु अभाव नहुँने र जोखिम खालका संक्रमितलाई राख्न सकिने उहाँले जानकारी दिनुभयो ।  

 कुनै पनि विषयमा अन्यौलता सिर्जना गर्ने काममा सञ्चारमाध्याम लाग्नु नहुने धारणा उहाँले राख्नुभयो । एउटै जिल्लाबाट पाँच / छ हजारको हाराहारीमा स्वाब संकलन भएर आउने भन्दै ढकालले अहिले दैनिक छ हजारम्म परीक्षण हुँदा पनि स्वाब होल्ड भएको जानकारी दिनुभयो। 

स्वास्थ्य सचिव लक्ष्मण अर्यालले परीक्षणको दायरालाई बढाउनुपर्ने बताउनुभयो । दक्षिण कोरियामा पनि पहिले परीक्षणलाई बढाइयो पछि त्यसले आर्थिक भार मात्र परेको विश्लेषण भएको भन्दै अर्यालले नेपालमा पनि आवश्यक मात्रामा मात्रै परीक्षण गरिनुपर्ने बताउनुभयो। 

मन्त्रालयका प्रमुख विशेषज्ञ डा.रोसन पोखरेलले कोरोना उपचारमा कुनै समस्या नहुने बताउनुभयो । 

राष्ट्रिय जनस्वास्थ्य प्रयोगशालाकी निर्देशक डा. रुना झाले देशमा छ हजारभन्दा बढीको एकैदिन परीक्षण भइरहेको भन्दै अमेरिकाजस्ता देशमा पनि लाखौको संख्याम स्वाब नमुना होल्ड भएको भन्दै यो समस्या नेपालमा मात्रै नभएको बताउनुभयो । 

स्वास्थ्य सेवा विभागका महानिर्देशक डा. दिपेन्द्ररमण सिंहले  कोभिडविरुद्ध सबै एक भएर चुनौतिका बीच अघि बढ्नुपर्ने बताउनुभयो । 

मन्त्रालयका गुणस्तर तथा अनुगमन महाशाखा प्रमुख डा.विकास देवकोटाले मापदण्ड पुर्‍याएका निजी क्षेत्रका प्रयोगशालालाई कोरोना परीक्षण गर्न दिइने जानकारी दिनुभयो । 

नीति योजना महाशाखा प्रमुख डा. गुणराज लोहनीले अब लक्षण नभएकालाई छुट्टै राख्न सकिने बताउनुभयो । नीजि अस्पतालमा संक्रमितको उपचार हुँदा लाग्ने खर्च सरकारले व्यहोर्ने बताउनुभयो । 

व्यवस्थापन महाशाखा प्रमुख डा. रमेश खरेलले हालसम्म एक अर्ब ६७ करोडको सामग्री स्वास्थ्य मन्त्रालयले खरिद गरेको जानकारी दिनुभयो ।

३९ हजार संक्रमितलाई सरकारी अस्पतालले धान्ने

मन्त्रालयले आउदो भदौ सम्ममा नेपालमा कोरोना संक्रमितको संख्या ३९ हजार पुग्ने प्रक्षेपण गरेको छ । मन्त्रालयद्वारा आयोजित पत्रकार सम्मेलनमा मन्त्रालयको इन्सिडेन्ट कमाण्ड सिस्टम को–अर्डिनेटर डा.गुणराज लोहनीले भदौसम्म ३९ हजार संक्रमित पुग्ने प्रक्षेपण गरिएको जानकारी दिनुभयो ।

उहाँले ३९ हजार संक्रमित सम्मलाई सरकारकै स्रोत र साधनले धान्न सक्ने बताउनुभयो । ३९ हजार संक्रमितमध्ये लक्षण देखिएका बिरामी ६ हजार, ५ हजारलाई अक्सिजन चाहिने र १ हजारलाई भेन्टिलेटरको आवश्यक पर्ने प्रक्षेपण मन्त्रालयको छ ।

मन्त्रालयका अनुसार अस्पतलालमा आइसोलेसन बेड ६ हजार ६७९, आइसीयू बेड १ हजार ८ सय र १ हजार भेन्टिलेटर तयारी अवस्थामा छ । संक्रमितहरुको उपचारमा सरकारी अस्पतालले धान्न नसके निजी अस्पतालको स्रोत र साधनको प्रयोग गर्ने र अपुग आइसोलेसन बेडका लागि मेडिकल कलेजलाई उपयोग गर्ने तयारी पनि सरकारको छ ।