२४ घण्टामा ४२६ संक्रमित थपिए,संख्या ८ हजार २७४
काठमाडौं । पछिल्लो २४ घण्टामा देशका विभिन्न जिल्लामा ४२६ जनालाई कोरोना भाइरस रोेग(कोभिड १९) को पुष्टि भएको छ । स्वास्थ्य तथा जनसंख्या मन्त्रालयका प्रवक्ता प्रा.डा जागेश्वर गौतमले नियमित प्रेस ब्रिफिङमा ३३८ पुरुष र ८८ महिलालाई कोरोना पोजेटिभको पुष्टि भएको जानकारी दिनुभयो ।
यो संगै कोरोना संक्रमितको संख्या ८ हजार २७४ पुगेको छ । जसमा ७ हजार ५६७ पुरुष र ७०७ महिला रहेका छन् । संक्रमण ७४ जिल्लामा फैलिएको छ । आज ३३ जिल्लामा संक्रमण पुष्टि भएकाहरुमा झापाका १, मोरङका २, सर्लाहीका ११, सप्तरीका ४, अछामका ७, बाग्लुङका ३२, बैतडीका ६८, बझाङका ३, बाजुराका ८, डडेल्धुराका ९, धादिङका १, डोटीका १५, गोरखाका ११, कैलालीका ४९, कास्कीका ८, काठमाडौंका ३, मोरङका १, म्याग्दीका १, नवलपरासीपूर्वका ४, सिन्धुलीका २३, तनहुँका १९, पर्वतका ५, उदयपुरका ३, चितवनका १, मकवानपुरका ८, स्याङजाका ३, अर्घाखाँचीका ६, गुल्मीका ९४, कपिलवस्तुका ४, नवलपरासी पश्चिमका १, रुपन्देहीका २, अछामका १, कञ्चनपुरका २० जना रहेका छन् ।
१ हजार ४०२ जना डिस्चार्ज भए
प्रवक्ता गौतमले पछिल्लो २४ घण्टामा २१६ जना डिस्चार्ज भएसँगै देशभर डिस्चार्ज हुनेको सख्या १ हजार ४०२ पुगेको जानकारी दिनुभयो । प्रवक्ता गौतमले पछिल्लो २४ घण्टामा ६ हजार २३१ जनाको पीसीआर परीक्षण भएको जानकारी दिदै हालसम्म पीसीआरबाट १ लाख ६१ हजार ७४९ जनाको परीक्षण भएको बताउनुभयो ।
हालसम्म आरडीटिबाट २ लाख ४७ हजार ८७४ को परीक्षण भएको छ जसमा पछिल्लो २४ घण्टामा ४ हजार ३९९ जनाको आरडीटिबाट परीक्षण भएको छ । आज १ लाख ९ हजार ४६१ जना क्वारेन्टाइनमा बसिरहेका छन् । हाल ६ हजार ८५० संक्रमितहरु आइसोलेसनमा रहेका छन् ।
तपाईँको अभिमत