पखालाबाट जोगाउन ६ लाख २० हजार बालबालिकालाई रोटारिक्स खोप दिइदै
रोटा भाइरसका कारण हुने पखाला पातलो पानी जस्तो हुन्छ जसका कारण शरिरमा पानी सकेर जटिल जल वियोजन गराई बालबालिकाको मृत्यु गराउँछ
काठमाडौं । पखालाका कारण हुने बालबालिकाको मृत्युलाई रोक्न नेपालमा रोटा भाइरस विरुद्धको खोप सुरु गरिने भएको छ । रोटा भाइरस विरुद्धको खोपलाई नियमित खोप कार्यक्रममा राख्दै जन्मेको ६ हप्ता र १० हप्ता गरी शिशुलाई दुईपटक रोटारिक्स खोप यही महिनाभित्र दिइने भएको छ ।
सरकारको नियमित खोप कार्यक्रममा हाल वीसीजी, पोलियो, पीसीभी, जेई, प्यान्टाभ्यालेन्ट (डीपीटी, हेपाटाइटिस बी, हिब) एमआर र एफआईपीभी खोप रहेकोमा अब रोटा शुरु भएपछि नियमित खोपको संख्या १२ पुगेको छ ।
परिवार कल्याण महाशाखा अन्तर्गत खोप शाखा प्रमुख डाक्टर झलक शर्मा गौतमले रोटाभाइरस विरुद्धको खोप एक पटकमा १.५ एमएल मुखबाट स्वास्थ्यकर्मीहरुले दिने बताउनुभयो । ग्लोबल एलायन्स फर भ्याक्सिन्स एण्ड इमुनाइजेसन (गाभी)को सहयोगमा युनिसेफले पठाएको ३ लाख २४ हजार भाइल रोटाभाइरस विरुद्धको खोप ‘रोटारिक्स’ आइसकेको र आजैबाट प्रदेशहरुमा वितरण गरिने र यसै महिनाभित्र बालबालिकाहरुलाई खोप दिइने उहाँले जानकारी दिनुभयो ।
हामी यो वर्षभरि ६ लाख २० हजार बालबालिकालाई रोटा विरुद्धको खोप दिइने उहाँले बताउनुभयो । रोटा भाइरसका कारण हुने पखाला पातलो पानी जस्तो हुन्छ जसका कारण शरिरमा पानी सकेर जटिल जल वियोजन गराई बालबालिकाको मृत्यु गराउने शर्माले बताउनुभयो ।
पछिल्लो ४ वर्षको सर्वेक्षणको तथ्यांक हेर्दा नेपालमा वर्षेनी ५ वर्ष मुनिका कम्तिमा ३ लाख ५० हजार बालबालिकाहरु पखालाका कारण सिकिस्त बिरामी भई अस्पताल भर्ना हुने गरेका छन् शर्माले भन्नुभयो,“हामीले सन् २०१० देखि २०१६ सम्म कान्ति बाल अस्पतालमा एक सर्वेक्षण गरेका थियौं जसमा पखालाका कारण अस्पताल भर्ना भएकामध्ये ३८ प्रतिशत बालबालिकालाई रोटा भाइरसका कारण पखाला लाग्ने गरेको पाइयो । ”
कम्तिमा ३ लाख ५० हजार बालबालिकाहरु पखालाका कारण सिकिस्त बिरामी भई अस्पताल भर्ना हुन्छन्
अझैपनि १० प्रतिशत बालबालिकाको मृत्यु पखालाका कारण हुने गरेको छ । पखालाका कारण हुने कुल मृत्युमा ३० प्रतिशत मृत्यु रोटा भाइरसबाट हुने पखालाका कारण हुने गर्दछ । रोटा भाइरस विरुद्धको खोपलाई नियमित खोपमा समावेश गरि बैशाखबाट सुरु गर्ने सरकारको योजना थियो तर कोरोना महामारीका कारण खोप आउन ढिलाइ भयो ।
रोटा भाइरसले विशेषगरी पखाला गराउँछ । वर्षमा दुईपटक जाडो र गर्मी सुरु हुने बेलामा बच्चाहरुलाई पखाला,रुघाखोकीको समस्या देखिने बरिष्ठ बालरोग विशेषज्ञ डा.ज्योतिरत्न धाख्वास्ले बताउनुभयो । उहाँले रोटाभाइरस विरुद्धको खोप नेपालमा आवश्यक थियो ढिलै भएपनि आएको छ यसले पखालाबाट हुने मृत्युलाई जोगाउन मद्धत पुग्नेछ उहाँले भन्नुभयो ।
सरकारले रोटाभाइरस विरुद्धको खोप सन् २०१६ देखि नै शुरु गर्ने तयारी गरेको थियो तर खोपको उपलव्धतामा विभिन्न समस्या हुँदा यो खोपको शुरुवात झण्डै ४ बर्ष पछि हुन लागेको हो ।
तपाईँको अभिमत