कोरोना संक्रमणबाट हुने मृत्युलाई जोगाउने औषधि पत्ता लाग्यो
कोरोना उपचारमा ब्रेक थ्रु
काठमाडौं । कोरोना भाइरस रोग (कोभिड १९)बाट गम्भिर बिरामी भएकाहरुलाई बचाउन सहयोग पुग्ने पहिलो औषधि पत्ता लागेको विज्ञहरुले दाबी गरेका छन् । बेलायतका विज्ञहरुले विश्वभर पाइने र सस्तो औषधि डेक्सामेथासोनले गम्भिर अवस्थाका कोरोना संक्रमितलाई बचाउन मद्धत पुगेको बताएका हुन् । उनीहरुले डेक्सामेथासोन स्टेरोइड थोरै मात्रा प्रयोग गर्दापनि गम्भिर किसिमका संक्रमितलाई बचाउन सकिएको र यो कोरोना उपचारमा ब्रेक थ्रु भएको बताएका छन् । गम्भिर बिरामी भई भेन्टिेलेटर र अक्सिजनको सहारा लिन परेका बिरामीमा यो औषधि प्रयोग गर्दा उनीहरुको मृत्युको जोखिम घटायो ।
भेन्टिेलेटरमा राखिएका बिरामीको मृत्यु हुने दर एक तिहाइ र अक्सिजन दिइएका पाँच मध्ये एक बिरामीलाई जोगाउने अनुसन्धानको दाबी छ । यसको मतलब गम्भिर बिरामीमा यो औषधिको प्रयोग गरेमा भेन्टिलेटरमा रहेका प्रत्येक आठ जना बिरामीमध्ये एक र अक्सिजन दिएर राखिएका प्रत्येक २५ बिरामीमध्ये एकको ज्यान जोगिने देखिएको विज्ञहरुको निष्कर्ष रहेको बीबीसीले जनाएको छ ।
प्रमुख अनुसन्धानकर्ता प्रोफेसर पिटर होर्बीले भन्नुभयो,यो एकमात्र औषधि हो जसले संक्रमितको मृत्युको जोखिमलाई घटाउँछ यो कोरोना उपचारमा ठुलो सफलता र ब्रेक थ्रु पनि हो । एकदमै स्पष्ट छ, यसबाट फाइदा छ विश्वभर यो औषधि पाइन्छ, एक बिरामीको खर्च जम्मा ३५ पाउण्ड मात्रै पर्न आउँछ । यो औषधि सास दिन पर्ने बिरामीका लागि मात्रै हो मध्यम र सामान्य लक्षण भएकालाई होइन होर्बीले स्पष्ट पार्नुभयो ।
कोरोना भाइरसको उपचारमा विभिन्न औषधिहरुको परीक्षण र विकास भइरहेको छ र परीक्षणहरु भइरहेका छन् जसमध्ये डेक्सामेथासोनको परीक्षण पनि एक थियो । डेक्सामेथासोन सन् १९६६ देखि दम रोगको उपचारमा प्रयोग गरिदै आएको पुरानो औषधि हो । अनुसन्धानमा संलग्न विज्ञहरु भन्छन् यदि यो औषधि बेलायतमा महामारी सुरु भएदेखि नै प्रयोग गरेको भए त्यहाँका ५ हजार मानिसलाई जोगाउन सकिन्थ्यो ।
यो औषधिको प्रयोगबारे जान्न अक्सफोर्ड यूनिभर्सिटिका विज्ञहरुको नेतृत्वमा भएको औषधिको परीक्षणमा अस्पतालमा भर्ना भएका २ हजार बिरामीमा यो औषधि दिइएको थियो । डेक्सामेथासोन औषधिको मुल्य सस्तो रहेकाले गरिब राष्ट्रमा ठुलो राहत मिल्ने विश्वास लिइएको छ । यस्तै एन्टीभाइरल औषधि रेम्डिसिभर पनि प्रभावकारी रहेको परीक्षणहरुले देखाएका छन् । रेम्डिसिभर इबोलाको उपचारमा पनि प्रयोग गरिएको थियो ।
तपाईँको अभिमत