चौरजहारी अस्पतालको १ करोड १९ लाख रकम बालबालिकाको निःशुल्क उपचारमा

रुकुम । रुकुम पश्चिमको चौरजहारी अस्पतालले १ करोड १९ लाख रकम ५ वर्ष मुनिका बालबालिकाहरुको निशुल्क स्वास्थ्य सेवामा खर्च गरेको छ । मानव विकास तथा सामुदायिक सेवाद्धारा संचालित अस्पतालले रुकुम सल्यान र जाजरकोट जिल्लाबाट विभिन्न समस्या भई उपचार गराउन आएका ५ वर्ष मुनिका बालबालिकाहरुलाई निशुल्क उपचार गरेको हो ।

आर्थिक अवस्था कमजोर भएका परिवकारको बालबालिकाको स्वास्थ्य उपचार तथा अस्पताल बसाँइका क्रममा खानपानमा उक्त रकम खर्चेको अस्पतालका प्रशासक डिल बहादुर गिरीले जानकारी दिनुभयो । उहाँका अनुसार गत वर्षको श्रावण देखि हालसम्म अस्पतालमा भर्ना भएका ५ वर्ष मुनिका १ हजार ७०९ जना बालबालिकाहरुको उपचार खानपानमा १ करोड १९ लाख रकम खर्च भएको हो । 

अस्पतालले बालबालिकाको पोषण स्थितिको जाँच गरी उनीहरुलाई सन्तुलित भोजन लिटो, दुध, अण्डा पनि निशुल्क रुपमा उपलव्ध गराउदै आएको छ भने नवजात शिशुहरुलाई कपडा समेत उपलब्ध गराउँदै आएको अस्पतालले जनाएको छ ।

यसैबीच कोरोना भाइरस रोग(कोभिड १९)को महामारीले प्रसुती सहित अन्य स्वास्थ्य सेवा प्रभावित भइरहेका बेला चौरजहारी अस्पतालमा प्रसुती सेवा सहज रुपमा सञ्चालन भइरहेको छ । बिगत १० महिनामा यस अस्पतालबाट ८ सय २९ जनाले सुत्केरी सेवा लिएका छन ।

नेपालमा संस्थागत प्रसुती दरमा सुधार ल्याई मातृ मृत्यूदरमा कमी ल्याउन आमा सुरक्षा कार्यक्रम एक प्रमुख कार्यक्रम रहेको छ । अस्पतालबाट यो आर्थिक वर्षमा हालसम्म ६५ हजार बिरामीले स्वास्थ्य उपचार सेवा लिएका छन् ।