चीनमा कोरोनापछि बाढीको प्रकोप, १३ जनाको मृत्यु लाखौं विस्थापित

बेइजीङ । चीनमा कोरोना भाइरस रोग (कोभिड १९) नियन्त्रणपछि बल्ल–बल्ल सामान्य बन्दै गएको जनजीवन पुनः बाढी र पहिरोको कारण प्रभावित भएको छ । 

दक्षिण र उत्तरी चीनमा भारी बर्षापछि आएको बाढी र पहिरोमा परि १३ जनाको मृत्यु भएको छ भने केही बेपत्ता भएका छन् । खराब मौसमका कारण लोकप्रिय पर्यटकीय क्षेत्रहरु प्रभावित भएका छन् जुन क्षेत्रमा कोरोना भाइरस रोग (कोभिड १९)को महामारीका कारण यात्रामा प्रतिवन्ध लगाइएको थियो । 

जुन २ देखि आएको बाढी र पहिरोका कारण २ लाख ३० हजार मानिस विस्थापित  भएका छन् । १ हजार ३ सय भन्दा बढी घरहरु डुबानमा परेको आकस्मिक व्यवस्थापन मन्त्रालयलाई उद्रत गर्दै चिनियाँ समाचार संस्था सिन्ह्वाले जनाएको छ । 

भारी वर्षापछि रोङ्गनमा बाढी,फोटो : एएफपी 

दक्षिणी क्षेत्र गुआंग्सीमा बाढीका कारण कम्तिमा ६ जनाको मृत्यु भएको भएको छ भने एक जना हराइरहेका छन् । यस्तै उत्तरी चीन हुवान प्रान्तमा ७ जनाको मृत्यु भएको छ । एक जना बेपत्ता भएका छन् । उत्तरी र दक्षिण क्षेत्रका सडकहरु जलमग्न भएका छन् । बाढीले ३० पर्यटकिय क्षेत्रमा पूर्ण रुपमा क्षति पुगेको छ । 

सन् १९९८ मा चीनमा बाढीमा परि २ हजार भन्दा बढीको मृत्यु हुनुका साथै ३० लाख घर डुबानमा परेका थिए । एजेन्सी ।