निजी अस्पतालमा संक्रमितकाे उपचार खर्च कसले व्यहोर्ने र कति लाग्ने ?
ह्याम्स अस्पतालको छतमा ल्याण्ड गरिएको हेलिकप्टर बाँया, ह्याम्स अस्पताल दाँया । तस्बिर : ह्याम्स अस्पतालको वेबसाइटबाट ।
जगन्नाथ ढकाल- जेष्ठ २४, २०७७ १६:०५ मा प्रकाशित
अ +
अ -
काठमाडौ । निजी अस्पताल सञ्चालकहरुले आफ्ना अस्पतालमा कोरोनाको उपचार गर्न सरकारी मापदण्ड बाधक बनेको बताउँदै आएका छन् । यसैबीच धुम्बाराहीस्थित ह्याम्स अस्पतालले भने शुक्रबारबाट कोरोना संक्रमितको उपचार सुरु गरेको छ ।
ह्याम्स अस्पतालमा उपचारत दुई बिरामीको कोरोना संक्रमण देखिएको शुक्रबार पुष्टि भएको थियो। त्यस अस्पतालमा उपचारमा रहेका गुल्मीका ७६ वर्षीय पुरुष र पोखराका ६० वर्षीय पुरुषमा कोरोना संक्रमण देखियो । गुल्मीका संक्रमितलाई सशस्त्र प्रहरी अस्पताल बलम्बु लगिए पनि पोखराका बिरामीलाई सोही अस्पतालमै उपचार थालिएको छ ।
खर्च गर्ने क्षमता भएका कोरोनाका बिरामीहरु निजी अस्पतालमा गएर राम्रो उपचार पाउने र नहुनेहरु उपचार अभावमा मृत्युको शिकार हुने अवस्था आउन सक्ने संकेत देखिन्छ ।
काठमाडाैंमा पहिलो पटक निजी अस्पतालमा कोरोना संक्रमितको उपचार भएको हो ।यसअघि राजधानीकै ग्रान्डी अस्पतालले आफ्नै कर्मचारीलाई कोरोना देखिँदा पनि पाटन पठाएको थियो । नर्भिकले पनि आफ्नो अस्पतालमा उपचारत बिरामी कोरोना पुष्टि भएपछि पाटन अस्पतालमै पठाएको थियो ।
ह्याम्स अस्पतालका प्रमुख कार्यकारी डा. ज्योतेन्द्र शर्माले ह्याम्स अस्पतालले कोरोना संक्रमितको उपचार सुरु गर्न लागेको जानकारी दिनुभयो।
उहाँले केहीदिन अघि हेलिकप्टरमार्फत उपचारका लागि ह्याम्स अस्पताल आउनुभएका बिरामीको स्वाब संकलन गर्दा कोरोना पोजेटिभ आएको जानकारी दिदै उहाँलाई अस्पतालमै उपचार गरिएको बताउनुभयो ।
अन्य अस्पतालभन्दा ह्याम्स अस्पतालको आइसोलेसन तथा आइसियु सुविधासम्पन्न रहेको दाबी गर्दै कोरोना संक्रमित बिरामीलाई सरकारी अस्पतालमा रिफर गर्दा बिरामीले ह्याम्समै उपचार गर्न चाहेको जानकारी दिनुभयो ।
डा. शर्माले संक्रमितको उपचार खर्च भने लाग्ने स्पष्ट पार्नुभयो । हामीले उहाँलाई ‘सरकारी अस्पतालमा जाँदा निशुल्क कोरोनाको उपचार हुन्छ भनेका थियौं डा. शर्माले भन्नुभयो,“तर उहाँले सरकारी अस्पताल भन्दा ह्याम्समै बसेर उपचार गर्ने र लागेको शुल्क पनि तिर्ने भएपछि हामीले ह्याम्स अस्पतालमै कोरोनाको उपचार सुरु गरेका हौं ।’
सरकारी अस्पतालमा सिट भएसम्म आफ्ना अस्पतालमा संक्रमण पुष्टि भएका बिरामी राख्न सरकारी मापदण्ड कारण नमिल्ने निजी अस्पतालहरुले जिकिर गर्दै आएका थिए। अस्पतालमा खर्च गर्न सक्ने क्षमताका कोरोना बिरामी भएका कारण ह्याम्सले आफ्नैमा राखेको स्पष्टै देखिन्छ ।
सरकारले कोरोना संक्रमितको निशुल्क उपचार गर्ने नीति बनाएको छ। अब निजी अस्पतालमा उपचारत बिरामीको खर्च कसले व्यहोर्ने र कति लाग्ने भन्नेबारे सरकारी नीति मौन छ ।
सबैजसो निजी अस्पतालहरुले कोरोना उपचारका लागि आइसालेसन कक्षहरु बनाएका छन् । कोरोना संक्रमितको उपचार गरेवापत अस्पतालले लिने शुल्कबारे स्पष्ट नहुँदा निजी अस्पतालहरु कोरोना बिरामीको उपचारबाट पन्छिएको देखिन्छ।
कोरोना संक्रमण दर बढिरहँदा संक्रमितहरुको अस्पताल नपुगी क्वारेन्टाइनमै मृत्यु भइरहेको छ । अब संक्रमित संख्या बढ्दै जाँदा अहिले तोकिएका कोरोना उपचार गर्ने सरकारी अस्पतालले धान्न सक्ने अवस्था देखिँदैन ।
खर्च गर्ने क्षमता भएका कोरोनाका बिरामीहरु निजी अस्पतालमा गएर राम्रो उपचार पाउने र नहुनेहरु उपचार अभावमा मृत्युको शिकार हुने अवस्था आउन सक्ने संकेत देखिन्छ । कम आए भएकाहरु निजी अस्पतालमा उपचार गर्न जान बाध्य भएमा त्यसको खर्च बिरामी आफैं व्यहोर्ने वा सरकारले गर्ने स्पष्ट नीति देखिँदैन।
सरकारले कोरोना संक्रमितले निजी अस्पतालमा बस्न चाहेको खण्डमा के गर्ने भन्ने बारेअहिले सम्म कुनै मापदण्ड बनाएकाे छैन ।निजी अस्पतालमा कोरोना संक्रमितको उपचार गर्ने विषयमा मन्त्रालयले औपचारीक निर्णय गरिनसकेकाले उपचार खर्च कस्ले कति व्यहोर्ने भन्ने सम्बन्धमा निर्णय भइनसकेको इन्सिडेन्ट कमाण्ड सिस्टम को–अडिनेटर डा.गुणराज लोहनीले जानकारी दिनुभयो ।
तपाईँको अभिमत