आज कोरोना पुष्टि भएकाहरु कहाँको कति ? (विवरण सहित)
२९० जना निको भए, १ लाख ६१ हजार २६२ मानिस क्वारेन्टाइनमा
काठमाडौं । आज देशका विभिन्न प्रयोगशालामा गरिएको परीक्षणमा थप ३३४ जनालाई कोरोना भाइरस रोग (कोभिड १९)को पुष्टि भएको छ । स्वास्थ्य तथा जनसंख्या मन्त्रालयको नियमित प्रेस ब्रिफिङमा प्रवक्ता डा.विकास देवकोटाले विभिन्न प्रयोगशालामा गरिएको परीक्षणमा ३१९ पुरुष र १५ जना महिलालाई गरि थप ३३४ लाई कोरोना पुष्टि भएको जानकारी दिनुभयो ।
यो संगै नेपालमा कोरोना संक्रमितको संख्या २ हजार ६३४ पुगेको छ । संक्रमित मध्ये २ हजार ४५० पुरुष र १८४ जना महिला रहेका छन् । कर्णाली स्वास्थ्य विज्ञान प्रतिष्ठान जुम्लामा गरिएको परीक्षणमा १०६ जनालाई कोरोना पुष्टि भएको छ । जसमा १०५ जना दैलेख र एक जना २७ वर्षका पुरुष मुगुका छन् । दैलेखका संक्रमितमध्ये ४ वर्षका बालक, ५ वर्षकी बालिका र ३२ वर्षका ५ जना महिला सहित बाँकी ९९ जना पुरुष रहेका छन् ।
राष्ट्रिय जनस्वास्थ्य प्रयोगशालमा गरिएको परीक्षणमा ९३ जनाको रिपोर्ट पोजेटिभ आएको छ । जसमा बारा गढिमाईका १९ देखि ३२ वर्ष उमेरसम्मका ५, धनुषाकी ३० वर्षकी महिला सहित ६ जना पुरुष, कपिलवस्तुका २६ वर्षकी एक महिला सहित २१ देखि ४८ वर्ष उमेर सम्मका ११ जना पुरुष,महोत्तरीका १९ देखि ३६ वर्ष उमेर सम्मका ३ पुरुष, रौतहटमा ६ महिने बालिका र ३ महिला सहित ६४ जना पुरुषलाई कोरोना पुष्टि भएको छ । यस्तै सर्लाहीका १९ देखि ४० वर्ष उमेर सम्मका ३ पुरुषलाई पनि कोरोना पोजेटिभ देखिएको छ ।
प्रादेशिक अस्पताल सुर्खेतमा गरिएको परीक्षणमा २ वर्षका बालक सहित ८ जना पुरुषको रिपोर्ट पोजेटिभ आएको छ । कोशी अस्पतालमा गरिएको परीक्षणमा झापाका १७ र २५ वर्ष र खोटाङका २१ देखि ४५ वर्ष उमेरसम्मका ३ पुरुषलाई कोरोना पुष्टि भएको छ । राप्ती स्वास्थ्य विज्ञान प्रतिष्ठान दाङमा गरिएको परीक्षणमा दाङको राजपुर, घोराही, बग्लाचुली, बबईका १६ देखि ३५ वर्ष उमेरसम्मका १४ जना पुरुष र २३ वर्षकी एक महिलालाई कोरोना पोजेटिभ देखिएको छ ।
धुलिखेल अस्पतालमा गरिएको परीक्षणम कपिलवस्तु कृष्णनगरका १७ जना पुरुषलाई कोरोना पुष्टि भएको छ । यस्तै आजै भेरी अस्पतालमा गरिएको परीक्षणमा बाँकेका १५ देखि ३५ वर्ष उमेरसम्मका ४२ जना पुरुषलाई कोरोना पोजेटिभ पुष्टि भएको छ । सेती अस्पतालमा गरिएको परीक्षणमा डोटी दिपायल सिलगढीका ४५ वर्षकी एक महिला सहित २२ र २७ वर्षका पुरुषलाई कोरोना पुष्टि भएको छ ।
यसैगरी पोखरामा गरिएको परीक्षणमा स्याङजा १८ वर्षका १ जना पुरुष,पर्वतका २१ देखि २८ वर्ष उमेर सम्मका ४ जना पुरुष, बाग्लुङमा ३३ वर्षकी एक महिला र १६ देखि ३३ वर्षसम्मका ९ जना गरि १० जनालाई कोरोना पुष्टि भएको छ । म्याग्दीमा १९ वर्षका एक पुरुषलाई कोरोना पोजेटिभ देखिएको छ ।
हेटौडामा गरिएको परीक्षणमा बाराका १२ वर्षका बालक र एक महिला सहित ७ जना र सिन्धुलीका १ र रौतहटका १८ वर्षका पुरुषलाई कोरोना पुष्टि भएको छ । विराटनगरमा गरिएको परीक्षणमा एक, नारायणी अस्पतालमा गरिएको परीक्षणमा एक किशोरी तथा वीपी स्वास्थ्य विज्ञान प्रतिष्ठानमा गरिएको परीक्षणमा झापा भद्रपुरका २७ देखि ५५ वर्षका पुरुष,ताप्लेजुङका २५ वर्षका १ पुरुष,सुनसरीका ३० वर्षका एक पुरुष र सप्तरी राजविराजका १७ देखि ४८ वर्ष उमेरसम्मका १३ जना पुरुषलाई कोरोना पुष्टि भएको छ ।
आइसोलेसनमा उपचाररत संक्रमितहरु
प्रदेश नम्वर १ मा १४९, प्रदेश नम्वर २ मा ८४३, बागमती प्रदेशमा २४, गण्डकी प्रदेशमा ५०, प्रदेश नम्वर ५ मा ८१६ र कर्णाली प्रदेशमा ३८० र सुदुरपश्चिममा ७३ जना गरि २ हजार ३३५ जना आइसोलेसनमा उपचाररत छन् ।
संक्रमितको प्रादेशिक विवरण
आज संक्रमण देखिएकामा मुगु जिल्ला थप भएपछि ६५ जिल्लामा संक्रमण फैलिएको छ । कोरोनाबाट प्रदेश नम्वर २ अति प्रभावित भएको छ, त्यहाँका सबै आठ जिल्लामा गरि ९६३ जनालाई कोरोना पुष्टि भएको छ ।
प्रदेश नम्वर १ को १२ जिल्लामा १९७, बागमती प्रदेशका १२ जिल्लामा ५९, गण्डकी प्रदेशको ७ जिल्लामा ५३, प्रदेश नम्वर ५ को ११ जिल्लामा ८९८, कर्णाली प्रदेशको ६ जिल्लामा ३८३ र सुदुरपश्चिमका ९ जिल्लामा ८१ जना गरि २ हजार ६३४ जनालाई कोरोना संक्रमणको पुष्टि भएको छ ।
२९० जना निको भए
पछिल्लो २४ घण्टामा १२ जना निको भएका छन् । नारायणी अस्पतालबाट ५ जना पुरुष, कलैया अस्पतालबाट ७ जना पुरुष डिस्चार्ज भएका छन् । देशभर डिस्चार्ज हुनेको सख्या २९० पुगेको छ जसमा २३४ पुरुष र ५६ जना महिला रहेका छन् । हालसम्म प्रदेश नम्वर १ मा ४८, प्रदेश नम्वर २ मा ११९, बागमती प्रदेशमा ३२, गण्डकी प्रदेशमा ३, प्रदेश नम्वर ५ मा ७९,कर्णाली प्रदेशमा २ र सुदुरपश्चिममा ७ जना गरि २९० जना डिस्चार्ज भई घर गएका छन् ।
पीसीआरबाट पछिल्लो २४ घण्टामा ४ हजार ९२४ जनाको परीक्षण
प्रवक्ता देवकोटाका अनुसार, पछिल्लो २४ घण्टामा ३ हजार ८६७ जनाको पीसीआर र आरडीटिबाट ५ हजार १८५ जनाको परीक्षण भएको छ । हालसम्म पीसीआरबाट ८४ हजार १३४ र १ लाख २५ हजार ५६४ जनाको आरडीटिबाट परीक्षण भएको छ । आज १ लाख ६१ हजार २६२ मानिस क्वारेन्टाइनमा बसिरहेका छन् ।
तपाईँको अभिमत